Aarhus avammut nioqquteqarnermut periarfissanik pitsaanerusunik pilerisaarisoq
- Nunarsuarmiunut niueqateqarnissamut tamanna Kalaallit Nunaannut pisariinnerussaaq,
taama oqarpoq, Aarhusip umiarsualiviani Aarhus Havnemi pisortaq Jakob Flyvbjerg Christensen,
taanna maanna pilerinarsaarniarluni nunatsinniippoq.
AAMMA ATUARUK Aarhusip Umiarsualivia Royal Arctic Linep siunissami atorniaraa
Containerit 445.000-it Aarhusip umiarsualivianut umiarsualivianiillu ukiumut assartorneqartarput, taamaalillunilu Danmarkimi umiarsualiviit anginersaralugu. Aalborgip umiarsualivianit umiarsualivianullu containerit 45.000-it ukiumut assartorneqartartut.
Umiarsuit 40-it sapaatip akunneranut nunarsuarmi illoqarfinnut assigiinngitsunut 21-nut toqqaanartumik ingerlaartarput.
Kalaallit Nunaannit avammut niuerutigineqartartut pingaarutilerujussuit aalisakkat kinguppaallu Kinamut aamma tuniniarneqartarnerat assersuutissaqqippoq.
Kinamut aqqut sivikinnerusoq
Nuummiit Kinami illoqarfissuarmut Shanghaimut umiarsuarmik ingerlaarneq ullumikkut ullunik 54-nik sivisussuseqarpoq. Tamannalu iluatsissinnaavoq lastbiilinik Aalborgimiit Aarhusimut assartuisarneq pisariaarutissammat.
- Ingerlaartarfiit allanngortinnerisigut toqqaannartumillu Aarhusip umiarsualivianut ingerlaartoqartalerpat, tassanngaaniit nunarsuup sinneranut ingerlaqqittoqarsinnaavoq. Taamaaliornikkut aqqut sivisooq ingerlaarfigineqartartoq pinngitsoortinneqarsinnaavoq, Aarhusip umiarsualiviani pisortaq Jakob Flyvbjerg Christensen taama oqarpoq.
Aarhusimi umiarsualivik piareersimavoq
Royal Arctic Line Islandimiut umiarsuaatileqatigiiffiannik Eimskipmik majip qaammataani suleqatigiinnissamik isumaqatigiissuteqarpoq.
Eimskip Aarhusip umiarsualivianik atuisuuvoq.
Royal Arctic Line Aarhusip umiarsualivianik siunissami atuisunngornissamik soqutiginnilluni saqqummiussaqarnikuuvoq, Aalborg umiarsuit Kalaallit Nunaannut Kalaallit Nunaanniillu angalasartut 1971-miilli umiarsualivigisarsimavaat.
Aarhusip umiarsualivia Kalaallit Nunaanni umiarsuaatileqatigiiffinnik suleqateqarnissaminik piareersimavoq.
- Tamannalu apeqqutaanngilaq 2019-mi imaluunniit 2022-imi aqaguluunniit Aarhusip umiarsualivia atorneqalissagaluarpat piareersimavugut Aarhusip umiarsualiviani pisortaq Jakob Flyvbjerg Christensen taama oqarpoq.
Royal Arctic Linep umiarsuai Aarhusip umiarsualivianut qaqugu ingerlaartalissanersut qulakkeerneqanngilaq, Aalborgip umiarsualiviata suli aalajangiusimagamiuk Royal Arctic Line-mik isumaqatigiissut 2022-ip tungaanut atuuttussatut.