Aarhusip Umiarsualivia Royal Arctic Linep siunissami atorniaraa
Danmarkip Radioa aamma Aarhus Stiftstidende taama allaaserisaqarput.
Nutaarsiassaqartitsiviit naapertorlugit, Royal Arctic Linep islandimiut umiarsuaatileqatigiiffiat Eimskip peqatigalugu umiarsuarnik nutaanik pisiniarneranik tamanna pissuteqarpoq.
Umiarsuit taakku ima angitigissapput Aalborgimi Grønlandshavnimut pulasinnaanatik, Aarhusimili taamaaliorsinnaapput umiarsualivik anginerungaatsiarmat.
- Royal Arctic Linep Aalborgimik atuiunnaarnissaminik kissaateqarnera assartuussinermut aqqutissanullu pitsaanerusunut piumasaqaataasunut Aarhusip Umiarsualiviata pitsaanerusumik atugassaqartitsinera pissutaavoq, Royal Arctic Linep pisortaanera, Verner Hammeken, DR-imut taama oqarpoq.
Royal Arctic Linep Aalborgip Umiarsualivianik 2019-imit atuiunnaarnissaminik aalajangernera Aalborgimi aalassatsitsivoq.
Royal Arctic Linep Aalborgip Umiarsualivianut maanna isumaqatigiissutaasoq 2022-p tungaanut atuuttussaq malinnianngippagu, 200 millionit koruuninik taarsiiffigineqarnissaq piumasaqaatigalugu eqqartuussivimmut suliassanngortinneqassasoq Aalborgip borgmesteriata Thomas Kastrup-Larsenip sioorasaarutigaa.
