Kiffartuussinissamut isumaqatigiissutit Justus Hansen iluarisimaaralunilu ernumanartitaqartoq
Taassuma Tunumi kiffartuussinissamik isumaqatigiissutit pillugit paragraf 37 atorlugu apeqquteqaatigisai sapaatit akunnerani matumani akineqarput.
Nerlerit Inaannut sapaatit akunnerannut marloriarluni timmisartuussisoqartassasoq, illoqarfiit nunaqarfiillu pisarnermissut sullinneqartassasut, kinguaattoortoqarnerani qularnaveeqquteqartoq akinillu qaffaasoqassanngitsoq, Justus Hansenip apeqquteqaataanut akissutini ilaatigut atuarneqarsinnaavoq.
AAMMA ATUARUK Kiffartuussinissamik isumaqatigiissutit misissuiffigineqarnissaat borgmesterip piumasarigaa
Tamannalu ajunngitsoq, Justus Hansen isumaqarpoq.
- Taamaaginnassaaq. Siornatigutuulli ingerlatsiinnassapput, tamannalu soorunami ajorseriaataanngilaq. Taava tamanna tusaatissatut soorunami tigussavarput, Justus Hansen oqarpoq.
Timmisartorli nioqqutissanik ilaasunillu angallassisussatut atorneqartussaq ernumassuteqarfigaa. Timmisartormi, Twin Otterimik taaguusilik anginngilaq, taamaammallu illoqarfiit nunaqarfiillu nioqqutissanik naammattunik pilersorneqannginnissaat Justus Hansenip ernummatigaa.
- Nioqutissat ataatsikkut nassiunneqarsinnaanngikkunik asiusarnissaat annilaangassutigaara, Justus Hansen oqarpoq.
AAMMA ATUARUK Suli pitsanngorsagassaqarpoq
AAMMA ATUARUK Wæver akisussaassuseqanngitsuliorpoq
Tunumi angallannermut billitsit akii qaqugu saqqummiunneqassanersut Justus Hansenip aamma paaserusuppaa. Norlandairip 2017-imut billitsit ulluni qaninnerni tuniniaalernissaa naatsorsuutigineqartoq attaveqaqatigiinnermut naalakkersuisoq apeqquteqaatip akissutaani allappoq.
Nerlerillu Inaannut billitsinik maanna pisisoqarsinnaalereersoq Norlandairip nalunaarutigaa. Assersuutigalugulu Akureyrimit Nerlerit Inaannut timmisartorneq januaarip ulluisa pingajuanni 1738 koruuninik akeqarpoq.
Aasamullu timmisartuussinissamut pilersaarut qanittukkut saqqummiunneqarumaartut Norlandairip KNR-imut nalunaarutigaa.
