Kiffartuussinissamik isumaqatigiissutit misissuiffigineqarnissaat borgmesterip piumasarigaa
Tamatumunngali peqatigitillugu borgmesterip innuttaasut, borgmesterit ingerlatsisullu ernumasut kiffartuussinissamillu isumaqatigiissutinik nutaanik qularinnittut isumaqatigai.
- Nunatta Avannaamiuusugut Qaanaap eqqaani, Upernavimmi Qeqertarsuullu tunuani angallannikkut pissutsinik isumakuluuteqarpugut, Ole Dorph taama allappoq.
Taamaammat suliap ingerlasimanera arlaannaanulluunniit attaveqanngitsumit misissuiffigineqarnissaa kissaatigaa.
- Taamaattumik suliap pineqartup suliarineqarsimanera qulaajaaffigitigu paasiumallugu sunik tunngaveqarnersoq. Taamaattumik avataani inissisimasumik attuumassuteqanngitsumillu suliap ingerlasimanera misissortitsigu nalunaarusiaritillugulu. Pisinnaappat tuaviortumik, Ole Dorph taama allappoq.
Borgmesteri ilaatigut isumaqarpoq oqallinnermi kussiortoqartoq kiisalu iluaqutaanngitsumik imminut nipituuliorfiginnittoqartoq, isumatuumik oqallinnissaraluamut iluaqutaanngitsumik.
Kommune Kujallermi borgmesteri kiffartuussinissamik isumaqatigiissutit suliallu ingerlasimanera isornartorsiorlugit novembarip naanerani ammasumik aamma allagaqarpoq. Taannalu Attaveqaqatigiinnermut naalakkersuisup Martha Lund Olsenip ammasumik allagaqarluni kingorna akissuteqarfigaa.
Kingullertigullu Aluu Airlinesip Air Greenlandip Disko Linellu suliariumannittussarsiuussinermut atatillugu unioqqutitsillutik isumaqatigiissusiorsimasutut pasillerpai.
