Avannaata Qimussersua illoqarfimmi aalajangersimasumi ingerlanneqartariaqarpoq
Visit Greenland Nunatsinni Takornariaqarnermut Siunnersuisoqatigiiffik Kalaallit Nunaanni Qimussertartut Kattuffiannut KNQK-mut qimussertarneq pillugu Ilulissani isumasioqatigiittoqarnerani taama kaammattuuteqarpoq.
- Sumiiffimmi ataatsimi ukiut tamaasa, soorlu una ArticCircle Racemi ukiut tamaasa sumiiffimi ataatsimi pineqartarpoq. Taamatut aaqqissuuneqartaleraluarpat qularnangitsumik tuniniarneqarnera ajornannginerujussuanngussagalurpoq, Nunatsinni Takornariaqarnermut Siunnersuisoqatigiit sinnerlugit Ilulissani isumasioqatigiinnermi peqataasoq Mads Daniel Skifte taama oqarpoq.
Aamma atuaruk Qimussertarneq qimmeqarnerlu meeqqanut inuusuttunullu pilerinarsarusukkaat
Sukkaniunnerit ukiut arlallit sioqqullugit pilersaarusiorneqartarnissaat Mads Daniel Skiftep pingaaruteqarnerarpaa.
- Takusinnaangikkaani ukiuni sumilu unammersuartoqassanersoq ingamillu aamma unnuisarfinnut tunngatillug amigaateqarpat, tuniniaruminaatsorujussuuvoq.
Qimussertarneq nittarsaanneqassooq
KNQK-mi siulittaasup Mikkel Jeremiassenip siunnersuut isumaqatigisinnaallugu oqarpoq.
Nunatsinnili qimussertarnermik kultooritta eqqugaanissaa aarlerinartoqartippaa.
Qimussertarnerup avammut nittarsaanneqarnerunissaa pisariaqartoq, KNQK aamma isumaqarpoq.
Kalaallit Nunaatali avammut nittarsaarneqarnerani qimussertarneq nittarsaanneqarluartoq Mads Daniel Skifte isumaqarpoq.
- Una qimussertarneq taavalau kalaallit qimmii naammattumik avammut nittarsaanneqartarsoraarput, aammalu takusinnaavarput ukua angalatitseqatigiiffiit nunarsuarmi assigiingitsuninngaaneersut atortuartaraat assit qimussernermik tunngasut.
Aamma atuaruk VIDEO Avannaata Qimussersua aningaasassaaleqivoq
Avannaatali qimussersuaqartarnerata nittarsaanniarnera ajornakusoortuusoq, Mads Daniel Skifte erseqqissaavoq.
- Takornarialerisunit tuniniarnerqarneq ajorpoq una tunngavigalugu aaqqissuusaq ukiumiit ukiumut illoqarfinnut assigiingitsunut nuttarneqartarmat.
Aamma atuaruk Kinamiut takornariat qimussiussisussaqanngillat
Ukiut tamaasa qimussersuaqartarnerata pilersaarusiorneqartarnera nittarsaanneqarnissaalu ajornakusoortartoq Mads Daniel Skifte oqarpoq.
- Ukiormannatut pisoqassagaluarpat, soorlu Qasigiannguaniittussaagaluarluni Qeqertarsuarmut nooriataarneqarnera, tamanna takornariarnermi atorneqarsinnaanginnami.
Aamma atuaruk Avannaata Qimussersua aningaasanut inatsimmiilerusuppoq
Takornarianilli qimussiussisarnerup qimussertartunut pilerisaarutiginissaa ajornakusoorpoq.
Kinamiut takornariartitsisartut 20-it qimussertarneq misiginiarlugu ukiormanna marsip qaammataani Ilulissanut takornariarput.
Qimussertartulli taamani qaleralinniarusunnerupput aningaasarsiornarnerummat.Taama pisoqarnera pillugu qimussertartut kattuffiaanni siulittaasoq Mikkel Jeremiassen ima oqarpoq.
- Takoqqikkusunnangilaq taanna, taamaammat arlaatigut pikkoriffiginerussagipput susassaqartut tamatta, suleqatigiiffigitigu tamanna.
Taassuma siunnersuutigaa illoqarfinniit allanit qimussiussisunik Ilulissanut tikisitsisoqarsinnaassasoq takornarianut atorneqarsinnaasunik.
