Kinamiut takornariat qimussiussisussaqanngillat

Kinamiut takornariat 20-t Ilulissanut ullumi tikipput issittumi misigisassat pingaarnerit ilaat tassalu qimusserneq misilissallugu.

Taamaakkaluartoq taakkua qimusseriarlutik 7774 kilometerisut isorartutigisumik angalanerat asuliinnarsinnarpoq, tassami takornarianik qimussinik angallassisartut amigaatigineqarmata.

Ilulissani qimusseqarpoq aamma angallassisartoqarpoq, taakkuali takornarianik angallassinatik qaleralinniarusunnerupput.

Kinamiut takornariat Ilulissanut tikittut, Ilulissat aamma Qeqertarsuup tunua qanoq alianaatsiginersoq ilisimasassiorfigissavaat.

- Aamma eqqarsaataavoq takornariarfigisartik nuannaringaaramikku takornarianik amerlanerusunik tikisitsisalernerannik kinguneqassasoq, Visit Greenlandimi siunnersorti, Malik Milfeldt, oqarpoq.

Kinamiut Ilulissani qimussernissaannut pilersaarut peerneqartariaqassaaq.

Malik Milfeldtip, Visit Greenlandimeersup, ukiuni 15-ini takornarianik sullissisarnerminni qimussiussisartunik amigaateqartoqarnera aatsaat naammattoorpaa.

- Takornariat angallanneqarnissaannut pilersaarutit kingulliit ulapputigaagut, maannakkullu takusinnaasarput naapertorlugu qimussimik angallassisinnaaneq qulakkeerneqanngilaq, tamannalu assut uggornarpoq ukiukkummi takornarianut neqeroorutigineqartut annersaat tassaammat qimusserneq, Malik Milfeldt oqarpoq.

- Qaleralinniarneq takornarianik angallassinermit iluanaarnarneruvoq, taama oqarpoq qimussertartut peqatigiiffianni  Qimussermi siulittaasoq, Ville Siegstad.

Peqatigiiffiup taassuma takornariartitsivinnik suleqateqarnini ukiut marluk pingasut matuma siorna unitsippaa.

- Takornarianik qimussinik angallassisartut akissarsiaat naammaginagit suleqatigiinneq unitsinneqarpoq. Tassami qimussiussisoqartillugu qimussiussisup aappaa kisimi akissarsiaqartinneqartarmat, Ville Siegstad oqarpoq.

- Takornarianik qimussiussisartut qaleralinnik qimussimik assartuillutik iluanaarnerusarput tamannalu paasisinnaavara takornarialerisuullunilu tamanna unammillernartuuvoq piffissap ilaani takornarianik sullissineq tunulliunneqartarmat, Malik Milfeldt oqarpoq.

- Ilulissani takornariartitsisartunut tamanna ajuusaarnartuuvoq, taakkuami takornarianut oqaluttuartariaqassammata  qimussinik angallassisinnaanerup nalaani qimussinik angalassisinnaaneq qulakkeerneqarsinnaanngimmat tamannalu ajuusaarnarpoq takutitsinerliornerullunilu, Malik Milfeldt oqarpoq.

Kinamiut takornariat ulluni pingasuni Ilulissaniissapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat