Avannaata Qimussersua aningaasanut inatsimmiilerusuppoq
- Inatsisartut aqqutigalugit aningaasaliisalernissaq pissusisamisoornerussasoq, Kaalaallit Nunaanni qimussertartut Katufffianni siulittaasuat Mikkel Jeremiassen oqarpoq.
- Nunarsuup issittortaa tamaat eqqarsaatigalugu, issittup qimmia, qimmeq qimuttoq Kalaallit Nunaani taamaallaat siumorneqarsinnaavoq taamaattumik qimmip qimuttup tammatsaalineqarnissaa suliniutigaarput, Mikkel Jeremiassen oqarpoq.
Avannaata qimussersuani sukkaniunnermi peqataasussat taakkualu qimmiisa qamutaasalu angallanneqarnissaannut kommuunit tapiissuteqartarput.
Kommuunilli Namminersorlutillu Oqartusaat avitseqatigiillutik tapiissuteqartalernissaat maanna siunnersuutigineqarpoq.
- Avannaata Qimussersuani sukkaniunnermi peqataassussat angallanneqarnissaannut, kommuunit Namminersorlutillu Oqartussat avitseqatigillutik aningaasaliisalerpata, tamanna kommuuninut oqinnerulissaaq, qulakkiigaanerulerlunilu, Mikkel Jeremiassen oqarpoq.
Kommuuninit tapiiffigineqartarnerup avataatigut tipsinit lottonillu eqquiniaanermit isertitaniit agguaanneqartartunit ukiut tamaasa qinnuteqartoqartarput.
Qimussertartut Tasiilameersut pingasut Avannaata Qimussersuanut peqataanissamut Kommuneqarfik Sermersuumut tapiiffigineqarnissamut qinnuteqaataat itigartitsissutigineqartoq, ippassaani tusarparput.
Taakkua Kommunimit milliuunit koruunit affaannik tapiiffigineqarpata timersortartunut allanut tapiissutigineqartartut eqqorneqassasut, kommuneqarfik Sermersuup itigartitsinermut tunngavilersuutigaa.
Avannaata Qimussersuani sukkaniunnermut peqataasussanut kommuunit tapiissutigisartagaat ataatsimut isigigaanni assigiinngillat.
Qaasuitsup Kommuniata ileqqoreqqusaq malillugu, Avannaata Qimussersuanut peqataasussat angalanerannut aningaasartuutit 65 procentii akilertarpai.
Qimusseq 89 Sisimiut, Avannaata Qimussersuani sukkaniunnermut peqataanerannut Qeqqata Kommunea 25.000 koruuninik siorna tapiissuteqarpoq.
Ukioq mannalu peqataanissaanut 30.000 koruunit amigaatigineqaleraluartut Qeqqata Kommmuneanit matussuserneqarput.
KNQK-ip Avannaata qimussersuani peqataasussanut kommuunit tapiissutigisartaagaasa nikinganerat iluaagivaat.
Kommuunit ataasiakkaat isumalluutaavallaarnerat Kalaallit Nunaanni Qimussertartut Kattuffiannit iluaagineqarpoq.
Nunatsinni Qimussertartut Kattuffiat aamma Inatsisartut Kultureqarnermut ataatsimiititaliaa marsip naalernerani ataatsimeeqatigiissapput. Ataatsimiinnermi Avannaata Qimussersuani sukkaniunnerni peqataasussat angallanneqartarnerinut assartorneqarnerinullu aningaasartuutit inatsisartut aningaasaqarnermut inatsisaannut ilanngunneqarnissaat oqaluuserineqassaaq.
Inatsisartut kultureqarnermut ataatsimiititaaliaa avannaanni angalanerminut atatillugu Kalaallit Nunaanni Qimussertartut Kattuffiat marsip 21-ani ataatsimeeqatigiissavaa.
