Jonathan Petersenip nunaqarfini eqqagassanik katersinermi ajugaanera tulluusimaarutigaa
Sarfannguani innuttaasut ulluni kingullerni nalinginnaasumit iluatsitsilluarnerulaarput. Taakkumi eqqagassanik piffissami kingullerni katersingaatsiarnermi kingorna unammisitsinermi "Nunaqarfiga kusanartoq"-mi ajugaapput.
- Tusagaq nuanneqaaq, aamma tulluusimaarnaqaaq, Sarfannguani najugaqartoq unammisitsinermilu peqataasimasoq, Jonathan Petersen oqarpoq.
Taassuma nunaqarfimmi innuttaasut unammisitsisoqarnerani suleqatigiilluarnerat pimoorussilluarnerallu pingaartumik erseqqissaatigaa.
- Assorsuaq nunaqqatigiit suleqatigiinnerat tassani ersarippoq, Sarfannguarmiut immaqa pisinnaasut tamarmik saleeqataagamik assut nuannerpoq, taanna oqarpoq.
Nunatsinni nunaqarfiit 16-it unammisitsinermi "Nunaqarfiga kusanartoq"-mi peqataapput. Unammisitsinermi illoqarfinnik nunaqarfinnillu eqqiluitsuutitsinissamut ataatsimut akisussaaffeqarnissaq ukkatarineqarpoq, tamannalu KNI-mit Royal Greenlandimiillu aaqqissuunneqarpoq.
Uanilu innuttaasut ataatsimoorlutik nunaqarfimminnik eqqiluitsuutitsinissamut eqqagassanik katersillutillu assigiinngitsunik suliniuteqarput. Suliaqarneq tamarmi Facebookikkut uppernarsaaserneqarpoq, nunaqarfiimmi ataasiakkaat torersaanerminnit assinik siammarteripput.
Tusarnaartitsinermik grillerinermillu nalliuttorsiutigineqassasoq
Unammisitsinermi makitsisoqarneratigut Sarfannguit ajugaavoq.
Suliaqarnermilu nalaani aaqqissuisunit najukkaminnilu suliffeqarfinnit aamma tapersiissuteqartoqarpoq, tamannalu nunaqarfimmut najugaasumut iluaqutaalluinnarpoq:
- Aamma uku suleqatigigatsigit Royal Greenlandimeersut, taavalu Timersoqatigiiffik Arctic Sports Sarfannguit. Taakua aamma qujamasunnartorujussuupput suleqataagamik, Jonathan Petersen oqarpoq.
Taassumalu suli amerlanerusunik unammisitsisoqartarnissaa neriuutigaa.
- Taanna suliniut assut nuannerami, taamaammat Kalaallit Nunaat tamakkerlugu saligaatsuutitsinissaq eqqummaariffigineqalissasoq.
Sarfannguani inuit ajugaanerminnik nalliuttorsiutiginninnissaa aamma utaqqivoq. Taakkumi nipilersortartunit Patrickimit Nuunumillu qaammatip tulliani tusarnaartitsivigineqarlutillu grillerissapput.