Politi: - Ikiaroornartunit aningaasanik malunnarunnaarsaanerup unitsinneqarnissaa ukkataraarput

Ikiaroornartoq nassatani, aqajaqqumi, allaallumi erlummi toqqorneqartarpoq.

Tassa inuit ikiaroornartumik anngiortumik nunatsinnut eqqusseriaraluartut ilaatigut toqqorsiffigisimasaat, ilanngaaserisullu nassaarisimasaat.

Ikiaroornartumik anngiortumik eqqusseriartoqartarnerata annertunerusumik iliuuseqarfigineqarnissaa pillugu Kalaallit Nunaanni Danmarkimilu ilanngaaserisut suliassamut nutaamik pilersaarusiulersaarput.

Tamannalu Lars Bjerregaardip, Kalaallit Nunaanni Politiini vicepolitiinspektørip, nuannaarutigaa.

Ikiaroornartumimmi anngiortumik eqqussisut nunatsinnut tikikkaangata akitsuuserisut politiit ilanngutinnginneranni naapitseqqaartuusarput.

- Kalaallit Nunaanni Danmarkimilu ilanngaaserisut pitsaanerusumik annertusisamillu suleqatigiissuteqalerpata iluatsilluarnerusinnaassaagut, Lars Bjerregaard oqarpoq.

Hashi 276 kiilu, aningaasallu 12,5 millionit koruunit nunatsinni 2020-mit 2023-mut arsaarinnissutigineqarsimapput.

Ikiaroornartup nunatsinnut eqquteriaraluarneqartup annertussusaa ukiuni kingullerni tallimanit qulinut allanngungaarsimanngilaq.

Ikiaroornartulli eqquteriaraluarneqartut allanngoriartorsimasut Lars Bjerregaardip oqaatigaa:

- Ikiaroornartoq ukiuni kingullerni eqquteriaraluarneqartoq annerusumik hashiusarsimavoq, tassa annertunerpaartaa hashiulluni. Ikiaroornartulli sakkortuut aamma eqqussorneqartalersimapput, pingaartumik kokaini amfetaminilu, taanna oqarpoq.

Aaqqissuussaanerusumik ikiaroornartunik tuniniaaneq

Nutaamik pilersaarusiaqalernerata kingunerisaanik nunatsinni Danmarkimilu akitsuuserisut ikiaroorunartunik anngiortumik eqqussuinermut ilisimasanik misilittakkanillu ilaatigut avitseqatigiittassapput.

Teknologii nutaaq, paasissutissallu nutaat, ilanngaaserisut suliassamut pilersaarusiaanni nutaami aallunneqarnerulissapput, ikiaroornartumik anngiortumik eqqusseriaraluartut paasilertorneqarsinnaaniassammata.

Ikiaroornartup nunatsinnut eqqussorneqartup annertunersaa Danmarkimeersuusoq Lars Bjerregaardip oqaatigaa:

- Ikiaroornartumik Kalaallit Nunaannut eqqussuinerup annertunersaa Danmarkimit aallaaveqartoq isumaqarpugut, Lars Bjerregård oqarpoq, nangillunilu:

- Eqqussuinerup ilaa pinerlunniaqatigiinnit aaqqissuunneqartartoq isumaqarpugut, taanna oqarpoq.

Nunatsinni eqimattat anngiortumik eqqussuinermut aamma aaqqissuussisarput, inuilli ataasiakkaat sukkasuumik annertuumillu iluanaaruteqarnissaminnik neriuuteqarlutik nammineq aamma eqqusseriartarput.

Ikiaroornartunut akiliutinik malunnarunnaarsaanerup ukkatarineqarnerulernera

Kisianni mittarfimmi, umiarsualivimmi allatigulluunniit eqqussinikkut akitsuuserisunit paasineqanngikkaanni ikiaroornartut aningaasarsissutaalluartarput.

Aningaasalli politiinut akileraartarnermilu oqartussanut malunnanngitsumik atorneqartussaapput.

Ikiaroornartunillu tuniniaasartunut nunarput – pappiaqqatigut – aningaasanik toqqorsiffissatut periarfissaavoq, sumiiffinnimi amerlasuuni aningaasat tigussaasut suli atugaapput.

- Nunarput aningaasanik aggornikunik atuiffiungaatsiarpoq, tassani nioqqutissat tapiissutinillu aningaasanik aggornikunik akiliisoqarsinnaavoq. Aningaasanik pinerluuteqarnikkut iluanaarutinik tamanna atuiffiusinnaavoq. Allatigut aningaasanik malunnarunnaarsaanermik aamma takusaqartarpugut, ass. akiligassartap allagartaanik eqqunngitsumik suliaqarnikkut, vicepolitiinspektøri, Lars Bjerregaard oqarpoq.

Taamaammat ilanngaaserisut atlantikup avannaa akimorlugu politiillu suleqateqarneq pitsaasuussasoq, taanna isumaqarpoq.

Periusissiaq nutaaq aningaasaqarnermut akileraartarnermullu naalakkersuisumit, Erik Jensenimit (S) aamma danskit akileraartarnermut ministerianit, Jeppe Bruusimit Nuummi sapaatip akunnerani matumani siusinnerusukkut atsiorneqarpoq.