Aarhusimi kattullugu pinngitsaaliisoqarnerata kingorna ilisimannittuusinnaasut ujaarineqartut
Østjyllandimi Politiit oqarnerat naapertorlugu arnaq kalaallinit naggueqartoq Aarhusimi pinngitsaalineqarpoq. Politiillu ilisimannittut arnamik pinngitsaaliisoqarnerata kingorna naapitsisimasut attavigerusuppaat.
Ilisimannittut tassaapput angutit marluk meerarlu Aarhusimi Langenæs Allémi arfininngornermi ualikkut arsamik pinnguartut, politiit tusagassiuutinut nalunaarummi allapput. Politiit angut biiliniittoq aamma attavigerusuppaat.
Sapaatip akunnerata naanerani tigummigallagassanngortinneqartut
Angutit pingasut arnamik 37-nik ukiulimmik pinngitsaaliisimasut sapaatip akunnerata naanerani tigummigallagassanngortinneqarput. Politiit pasilliutaat naapertorlugu pinngitsaaliineq Langenæs Allémi inissiami arfininngornermi ullaakkut arfineq-marluk 13.05-llu akornanni pisimavoq.
Østjyllandip Politiivisa suliami pinerlineqartumik Langenæs Allémit anineranit attaveqarsimasunik ujaasinertik sisamanngornermi saqqummiuppaat.
Angutit marluk meeqqamik arsaqateqartut saniatigut angut biilini qaqortuniittoq arnamik oqaloqateqarsimasoq politiit paasissutissaatigaat. Taannalu angut politiinit aamma attaveqarfigineqarusuppoq.
Østjyllandip Politiivisa oqarnerat naapertorlugu suliami paasissutissat tamarmik naleqqutissapput, politiillu angutit pingasut allallu sumiiffimmiissimasut imaluunniit suliamut atatillugu paasissutissaateqarsinnaasut oqaloqatigerusuppaat.
Angutit pingasut pasineqartut matoqqasumik eqqartuussinerup kingorna sapaammi tigummigallagassanngortinneqarput. Angutit tassunga atatillugu pinngitsaaliisimasutut kiffaanngissusiiaasimasutullu pasineqartut taakkulu pinngitsuunerartut paasissutissiissutigineqarpoq.
Tamatuma saniatigut politiit angutit marluk suliamut atatillugu ujaarigaat aamma paasissutissiissutigineqarpoq.
Østjyllandip Politiivisa arnaq angutillu illoqarfissiornermi imminnut naapissimasut misissuinerup aallartinnerani erserpoq.
