Angut kokainimik anngiortumik eqqusseriarsimasutut erngertumik pineqaatissinneqartoq
Angut 34-nik ukiulik Kangerlussuarmi akitsuuserisunit juunip 17-iani unitsinneqarpoq. Angutip timaata scannerneratigut angut kokainimik 167,5 grammimik ilumini toqqorsimasuutitaqartoq paasineqarpoq.
Angut ikiaroornartunik anngiortumik eqqusseriartutut pasineqarpoq. Angutillu tamanna nassuerutigimmagu suliaq nassuernermi suliatut suliarineqarpoq.
Kalaallit Nunaanni Politiit tusagassiuutinut nalunaarummi allapput.
Angut taamaattumik Eqqartuussisoqarfik Sermersuumi ullumi sassartinneqarpoq. Angut eqqartuunneqarpoq, ukiunilu sisamani qaammatinilu arfinilinni pineqaatissinneqarsimasunut inissiisarfimmiittussanngortinneqarluni.
- Kalaallit Nunaanni Politiit akitsuuserisut inunnik nunatsinnut anngiortumik eqqusseriartunik paasisaqarnissamut suliaqangaatsiartunik qanimut suleqateqarput, Kalaallit Nunaanni Politiit misissueqqissaartarfiani aqutsisoq, politikommissæri, Malik Sandgreen tusagassiuutinut nalunaarummi oqarpoq.
Qaammatip ataatsip ingerlanerani ikiaroornartunik sakkortuunik anngiortumik eqqusseriaraluartumik aappassaanik tigusarinnittoqarpoq. Arnaq kokainimik 200 grammimik maajimi anngiortumik eqqusseriarsimasutut ukiuni sisamani qaammatinilu tallimani pineqaatissinneqarsimasunut inissiisarfimmiittussanngortinneqarpoq.
- Kalaallit Nunaanni Politiit suliat inuit inuunerannut peqqissusaannullu ataatsimut navianarluinnartuusinnaammata ilungersunarluinnartutut isigaat. Taamaammat ikiaroornartunik sakkortuunik nunatsinnut anngiortumik eqqusseriartunik naammattuuisarnerput ernumanartuuvoq, politikommissæri oqarpoq.
