Johan Lund Olsen puisit amii pillugit Bruxellesimut nassuiaajartorpoq
EU-Kommissioni aalajangiisinnaagaluarpat nunanut EU-mut ilaasortaasunut puisit amiinik eqqussuinermi malittarisassat Kalaallit Nunaannut assut ajoqutaasumik sukaterifffigineqassagaluarput.
Danskit kalaallillu politikerii taama isumaqarput. Taakkununnga ilaavoq Inuit Ataqatigiinneersoq Johan Lund Olsen.
Ajornerpaamik pisoqassappat inuussutissarsiut taanna atorunnaassaaq. Puisit amiinik nunanut allanut tunisisinnaajunnaaraluarutta, taava Nunatsinni nunaqarfiit avinngarusimasumiittullu amerlasuut imminnut napatissinnaajunnaassapput.
WTO-p naliliinera malinneqarpoq
Malittarisassanik sukateriniarneq pivoq Nunat tamalaat niueqatigiinnikkut suleqatigiiffiat WTO siorna aasakkut naliliimmat, naggueqatigiit Inuit issittumilu nunap inoqqaavisa allat EU-mut puisit amiinik eqqussisinnaatitaanertik atorluarpallaarsimangaat.
Naggueqatigiit inuit pineqannginnissaannik aalajangersagaq 2009-mi atulersinneqarpoq, issittormiut ileqqutoqartik malillugu puisinniarnikkut inuuginnarsinnaanerat anguniarlugu.
EU Danmarkiluunniit EU-mi innuttaasunut nassuiaassinissartik pikkoriffigisimanngikkaat, Johan Lund Olsen isumaqarpoq.
- Isumaqarpunga EU-Kommissioni matumani naammattumik suliniuteqarsimanngitsoq. Paasititsiniaanissartik suliarisimanngilaat. Europami tuniniaavinnilu paasisimanngilaat nungusaataanngitsumik piniartaratta. Puiserpassuit 2 millionit imartatsinniipput, taakkunanngalu taamaallaat 150.000-it missaanniittut pisarisarpavut. Biologit ilisimatusartullu oqartarput ukiumut millionit affaat pisarisinnaagigut. Taamaaliortanngilagulli, Johan Lund Olsen KNR-imut oqarpoq.
Qinikkamiit qinikkanut nassuiaaneq
Taamaattumik Johan Lund Olsen marsi naalerpat nammineq Bruxellesiliassaaq suleqatinilu puisinniartaatsitsinnik nassuiaallugit.
- Bruxellesiliarninni qinikkamiit qinikkanut nassuiarneqassaaq, Nunatsinnut kingunerisassai, piniartunut nunaqarfinnullu, naggataagullu Nunatsinnut tamarmut kingunerisassai, Johan Lund Olsen oqarpoq.
Sukatiteriniarneq pillugu Siumut aamma akerliliisimavoq. Naggueqatigiit Inuit pineqannginnissaannik aalajangikkap sukaterneqarnissaanik aalajangernermut Nunatta EU-mut taamaatsiseqqunera Danskit avatangiisinut ministeriata, nunanullu allanut tunngasunut ministeriata taperserpaat.
EU-Kommissioni kingusinnerpaamik ukioru oktobarip 18-ianni tamatumunnga aalajangiissaaq.
