Assi: Simon Uldum

PITUFFIK Johan Lund Olsen: Hammond Hardenbergilu ilisimatinneqarsimapput

Namminersorlutik Oqartussani atorfilittat qullersaasut arlalissuit Pituffimmi kiffartuussinissamik isumaqatigiissummut tunngatillugu suliariumannittussarsiuussinermut malittarisassanik ilusilersueqataasimanerat ullumi tusarliunneqarpoq.

Inuit Ataqatigiit sinnerlugit Folketingimut ilaasortaq, Johan Lund Olsen, Nunat atlantikup avannaamiut illuanni Odensemiittumi Nunatsinni naalakkersuisunikkut pissutsit Folketingimilu suliaminik ullumi saqqummiussineranut atatillugu tamanna pillugu oqaloqatigaarput.

- Ilisimaqartutut, Pituffimmi kiffartuussinissamik isumaqatigiissut 2013-imili isumaqatigiinniutigineqarluni aallartinneqareerpoq, taamanili ilisimavarput uagut.

 - Tassa, taannaana qulaajarluarusukkaluaripput, qanoq annertutigisumik naalakkersuinermik suliaqartut nunatsinneersut akuutinneqartigippat, taamanili? Uanga nammineq takoreerpakka, assersuutigiinnarlugu Greenland Contractorsimit e-mailit, allakkat aammalu Naalakkersuisut siulittaasuannut Aleqa Hammondimut aammalu Svend Hardenbergimut atorfilittanut qullersaasumut nassiunneqarsimasut. Oqaatigineqarluni allakkani taakkunani, "Eqqumaffigisariaqarparsi imatut pisoqariaannaavoq, amerikamiut imaassinnaavoq kiffartuussinissamik isumaqatigiissut pissarsiarigaat".

 - Naalakkersuinermik suliaqartut, qullersarisarput taamani, taavalu atorfilittanut qullersaq ilisimasaarneqareerput taamatut kinguneqariaannaasoq, tassalu taanna massakkut takuarput, Johan Lund Olsen taama oqarpoq.

AAMMA ATUARUK Lidegaardip USA peqquaa Pituffiup kiffartuunneqarnissaanik isumaqatigiissut unitseqqullugu

Paasissutissat imminnut naapertuutinngitsut

Namminersorlutik Oqartussat, Naalakkersuisut siulii maannakkullu Naalakkersuisuusut Pituffimmi kiffartuussinissamik isumaqatigiissummut tunngatillugu suliariumannittussarsiuussinermi malittarisassat allanngorsimanerat ilisimasaqarfiginagu arlaleriarlugu oqaatigineqarpoq.

Taamaammat Nunarput politikerinit aqunneqarani atorfilittanit aqunneqarpallaarnersoq apeqqutaalerpoq.

 - Tassa tamakkuukua pissutsit qulaajaniarusullugit iternga tikillugu misissuisitserusukkaluartugut nunatsinni, kisianni maani Danmarkimi aamma uanga isumaqarpunga misissorneqartariaqartoq qanorpiaq pisoqavissimanersoq. Kisianni Nunatsinni tamanna amerlanerussuteqartunit kissaatigineqarpallaanngilaq.

AAMMA ATUARUK Folketingimi amerlanerussuteqartut Pituffik pillugu isumaqatigiissut unitsikkallaqqugaat

- Massakkut pissutsit imaalernikuupput nunatsinni naalakkersuisuusimasut massakkullu naalakkersuisuusut, taavalu illuatungaani danskit naalakkersuisuisi, imminnut naapertuutinngitsumik oqalullutik. Taava kina upperissavarput? Danskit naalakkersuisui imaluunniit nunatsinni naalakkersuisut?

- Taamaammanuna iternga tikillugu tamaaviat qulaajarneqartariaqartoq, kisianni oqaatigeriikkattut, Greenland Contractorsip aggustimi 2013-imili, taamani Naalakkersuisuit siulittaasuat Aleqa Hammond, aammalu atorfilittanut qullersaq, taamanili ilisimatinneqareerput imatut pisoqariaannaavoq. Tassalu taamatut pisoqarpoq. Taamanersuarli qanoq iliuuseqartoqarsimasariaqaraluarpoq, Johan Lund Olsen KNR-imut taama oqarpoq.

Amerikamiut apeqqutaalerput

USA-p Pituffimmik atuineranut akiliuteqartalernissaa aammalu Pituffik immikkut pillugu USA-p nutaamik isumaqatigiissuteqarfiginissaa siunnersuutigineqarpoq. Taamatut siunnersuuteqartoqarnera piviusorsiorsoraajuk,  amerikamiut taamaaliorusussappat?

- Taanna maannakkorpiaq oqaatigiuminaattorujussuuvoq, kisianni isumaqarpunga aallaavigisariaqaripput januaarip 22-ani oqallinnitsinni Folketingimi partiit tamarmiulluta, Dansk Folkeparti kisimi peqataaffiginngisaanik, isumaqatigiissutigisarput, tassalu Pituffimmi kiffartuussinissamik isumaqatigiissut ingerlatseqatigiiffimmit danskinit kalaallinillu pigineqartumit isumagineqartariaqartoq. Nunarput annertunerpaamik amerikamiut nunatsinniinnerannit  aningaasatigut pissarsisariaqarpoq, suliffissat kalaallinit qallunaanillu sulisartunit kivinneqartariaqarput, aammalu kalaallit ilinniartut amerlanerpaat Pituffimmi ilinniartinneqartarnissaat qulakkeerneqartariaqarpoq.

AAMMA ATUARUK Suliariumannittussarsiuussinermut malittarisassat nutaat Namminersorlutik Oqartussat akuerisimavaat

- Tassa taanna Folketingimi partiit amerlanerussuteqarluartut akuersissutigisaat, tassalu taanna danskit naalakkersuisuisa nunatsinni naalakkersuisut peqatigalugit maannakkut isumaginiagassaat amerikamiut tungaannut, Inuit Ataqatigiit sinnerlugit Folketingimut ilaasortaq Johan Lund Olsen taama oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl