VIDEO Jens Kjeldsen ujaqqanik takorluuivoq
Ujaqqallu pitsaassusaat apeqqutaasarput.
- Manngersuseq soorunami apeqqutaavoq, tassa katagaasorsuusariaqanngillat, taava ajussooq. Kisianni Kalaallit Nunaata ujarai, qaarsua pittaavoq. Qulloorneqalaartarpoq, anigorneqarsinnaavoq. Eqqumiitsuliortoq Jens Kjeldsen oqarpoq.
Qiperuisaleramili sulimi 149-ssaat ullumi qiperuisarfimmini ilusilersorpaa.
- Tassa aasakkut skoqarnata aneertarluta ilaatigut sukkittarpugut. Una arnaq sukissimavoq, aana isigassaa uaniippoq, nikorfavoq uani takusinnaavarsi. Aana saamerleq, taava nului aajuku. Taava sukkissimavoq isikkamigut, taava imaaliortussaavoq… Ussersuutigaluni nassuiaavoq.
Inuit assilillugit qiperuissalluni Jens Kjeldsenip unamminartuunerarpaa, qiperugassaatali 150-ssaata aamma inuunissaa ilimanarpoq.
- Sunngortissinnaassavara? Immaqa inuk arpattoq, immaqa tillinniarsimasoq qimaasoq, tillitaa uaniissalluni. Imaassinnaavoq aamma franskeq sakkutooq musketeri, ilaa? Jens Kjeldsen takorluuilluni oqarpoq.
Jens Kjeldsenip suliami ilai kultorikkut illorsuarmi Katuami januaarip arfineq pingajuannit 25-anut saqqummersissavai.