Jens-Frederik Nielsinip Danmarkimut atassuteqarneq nukittorsarusukkaa

Kalaallit Nunaata namminiilivissinnaanngornisaata tungaanut nunatta Damnarkimik suleqateqarneq nukittorsarusuppaa.

Naalakkersuisunut siulittaasunngortussaq, Jens-Frederik Nielsen nutaarsiassaqartitsivimmut Reutersimut oqarpoq.

- Ullumikkut naalagaaffeqatigiippugut, taamatullu aaqqissuussamut ilaatilluta namminiilivissinnaanngornissatta tungaanut atassuteqarnerput suleqatigiinnerpullu nukittunerulersittariaqarparput, taanna ataasinngornermi oqarpoq.

Ullumikkut “suleqatigiinneq pitsaasumik inissisimasoq”, Jens-Frederik Nielsenip ilanngullugu oqaatigaa.

Kalaallit Nunaat USA-lu aamma suleqatigiitsikkusullugit, nangilluni oqaatigaa. Kisianni ataqqeqatigiinnermik tunuliaqutaqassasoq, taama politikeri nunatsinni qinersinermi partiini toqqagaanerpaasumi Demokratini ilaasortaq oqarpoq.

Taanna USA-p præsidentiata Donald Trumpip USA-p nunarput aqulerniarlugu ulluni kingullerni oqaatigisaqattaareeraa taama oqarpoq.

- Kalaallit Nunaat pissavarput. Aap, qanorluunniit, sapaatip-akunnerata naanerani taama NBC News-imit apersorneqarnermini oqarpoq.

Kalaallit namminiilivikkusuttut, Kalaallit Nunaallu tuniniagaanngitsoq, qallunaanit kalaallinillu erseqqissaatigineqarpoq.

Jens-Frederik Nielsen Reutersimit apersorneqarnermini oqariartuut tamanna arlaleriarluni erseqqissaatigaa.  

- Kalaallit Nunaat USA-mut atalernavianngilaq. Suleqatigiissinnaavugut. Nunatsinni sillimaniarneq pillugu soorunami aamma pitsaasumik suleqatigiikkusuppugut. Kisianni ataqqeqatigiinnermik tunuliaquteqassaaq.

- Tuniniagaalernavianngilagut aamma amerikamiunngornaviannngilagut, Jens-Frederik Nielsen oqarpoq.

/ritzau/