Mette Frederiksen Nuummut tikittoq

Ministeriuneq, Mette Frederiksen Nuup Mittarfianut tikippoq.

Taassuma tallimanngorpat tungaanut nunatsinniinnermini naalakkersuisunut siulittaasunngortussaq, Jens-Frederik Nielsen naalakkersuisunngortussallu eqimattat ataatsimeeqatigissavai.

Naalakkersuisut Inatsisartunit suli akuerineqannginnerat pissutigalugu ministeriunerup tikeraarnissaata piffissalerneqarnera naleqqutinngitsoq, nunanut allanut naalakkersuisunngortussap, Vivian Motzfeldtip nalunaarutigereeraluaraa – Atassutillu siulittaasuata tamanna tapersereeraluaraa ministeriuneq tikippoq.

Mette Frederiksen ukioq ataaseq sapaatit akunnerilu marluk matuma siorna nunatsinnut kingullermik tikeraarpoq. Taamani tikeraarnera EU-p allaffianik pilersitsinermik aamma Europa-Kommissionip siulittaasuata Ursula von der Leyenip Nuummut tikeraarneranik pissuteqarpoq.

Oqaluuserinninnissamut qilanaartoq

Danskit ministeriunerata imaluunniit Múte B. Egedep mittarfimmut aallertuusup mittarfimmi oqaaseqartinnissaat periarfissaanngilaq. Mette Frederiksenili Hans Egedep Illuata saani naalakkersuisunut siulittaasunngortussamik, Jens-Frederik Nielsenimik naapitsiffigisamini ataasiakkaanik oqaaseqarpoq.

Naalakkersuisut nutaat sapaatip akunnerata tulliani akuerineqarnerani aatsaat tikeraartariaqaraluartutit ilaat isumaqarput. Tamanna qanoq isumaqarfigiviuk?

- Tamanna oqaluuserineqartoq takuara, Kalaallit Nunaannilu tmaanut oqaatigerusutaqaannarpunga, tassa ataasiinnarmik kissaateqarama tassalu sapinngisara tamaat atorlugu nuna alianaatsorsuaq manna paariniarlugulu pissutsini ilungersunartuni tapersersorniarakku. Maannali maaniippugunga, oqallisigisassagullu qilanaaraakka, ministeriuneq oqarpoq.

Taassumalu nammineq aamma Múte B. Egede arlaleriarlutik oqaatigisimasatik uteqqippai:

- Kalaallit Nunaat kalaallit pigaat, USA-llu tigunavianngilaa.

Oqariartuullu tamanna naalakkersuisullu ulluni tulliuttuni oqaatiginiaritsik oqaatigalugu.