Jens B.: Tamat oqartussaaqataanerannut kusanaatsuliorneq
Partiimik pilersitsisup Nikku Olsenip nunatsinni inatsisartunut ilaasortanngornissaminut naleqqutinngitsutut aalajangiiffigineqarnerata kingorna nunatta inissisimalernera Jens B. Frederiksenip oqaaseqarfigigamiuk isertuanngilaq.
-Isumaqarluinnarpunga tamat oqartussaaqataanerannut kusanaatsuliornerusoq. Qinigaasinnaanani ilisimareerlugu partiimik pilersitsisinnarluni qinigassanngortittoqarsinnaanngilaq. Partii Inuit Nikku Olsenilu qinigassanngortissimanngitsuuppata qinersinerup inernera allaanerulluinnarsimassagaluarpoq. Nikku Olsen qinigassanngortissimanngitsuuppat partiip taperserneqarsimassanngikkaluarpoq, Jens B. Frederiksen KNR-imut oqarpoq.
Nikku Olsenip qinigaanerata atorunnaarsinneqarnerata malitsigisaanik politikerit allat inatsisiliornerup allanngortinneqarnissaanik kissaateqarlutik oqaaseqarsimapput, taamaaliornikkut matumani kusanaatsuliornertut iliortoqaqqinnginniassammat. Qinigassanngortittartut akuerineqartarnerat allanngortinneqartariaqarpoq.
-Qinersisartut krydsiliinnginnerini qinigassanngortittunik naliliisoqartalernissaa pillugu siunnersuummik Inatsisartunut saqqummiussassaminnik Demokraatit suliaqarput. Qinersisartunik nikassaanertut isigaarput, pingaartumik Nikku Olsenimik qinersisimasunut. Qinigaasinnaangitsutut aalajangiiffigineqartussaalluni ilisimaaralugu qinigassanngortittoqarsinnaanera kanngunartuliornervoq, Jens B. Frederiksen isumaqarpoq.
Nikku Olsenip qinigaasinnaannginnerminik ilisimasaqarsimanngeratarsinnaaneranik aperineqarami, Jens B. Frederiksen eqqarsaqqinniarluni unikkaallassinnarluni akivoq: Taanna oqaaseqarfigissanngilara.
