Jens B: Naalakkersuisuusarsimasut inissiat ajornerujussuannut pisuupput
- Ineqarnermut akisussaaffik 1987-imi tigugatsigu, aamma inissiat pitsaavallaarsimanngillat. Taassumalu aamma kingorna, aserfallatsaaliinermut aningaasat immikkoortinneqartut ikippallaartarsimapput. Aamma arlaleriarluni siullermik 1997-iminngaannit 2002 tungaanut, ineqarnermut akiliutip qaffanneqarnissaa unitsinneqarpoq. Aammalu 2008-mi aalajangerneqarpoq 2009-mi qaffassanngitsoq. Taamaammat ajornartorsiutit taakku utertuarput, ukiullu tamaasa aningaasat taakku amigaataalerlutik. Taamaammat akisussaaffik tassaniippoq,
Ineqarnermut Naalakkersuisoq Jens B. Frederiksen, taama oqarpoq.
Siumumi siulittaasup tulliata, Karl Lyberthip, Aasianni ininik attartortut qaammatini marlunni imermik kissartoqarpiaratik kiassaatinilu kissartoqarpiarsimanngitsut, Naalakkersuisunit utoqqatserfigineqaqquai.
Kisianni Jens B. Frederiksen oqarpoq, Namminersorlutik Oqartussat inaataannit 6.400-t missaaniittunit 4.500-t iluarsaanneqarneqanngikkunik piiaannarneqartariaqartut. Tamaangalu killinneq akiliutit qaffatsaaliorneqarnerannik peqquteqartoq, Jens B. Frederiksen isumaqarpoq.
Aningaasallu 5 milliardit koruunit, inissianik iluarsaassinissamut, isaterinissamut taarsersuinissamulluunnit ukiuni 17-ini 2029-ip tungaanut atorfissaqartinneqarput.
Taamaammallu Naalakkersuisut ukiuni qulini tulliuttuni, 250 millionit koruuninik inissianik iluarsartuussinermut atugassanik immikkoortitsisarniarput.
Iluarsartuussinissamut aningaasanik amigartooqqanerujussuaq, politikerinit ilisimaarinneqareerpoq.
Namminersornerullutik Oqartussaasimasut ineqarnermut aqutsinermut akisussaaffik 1987-imili tigummassuk, aningaasat inissianut iluarsaassinissamut atugassat ikippallaareertut, INI tusagassiutinut septembarimi 2008-mi allappoq.
INI taamani nangilluni allappoq, inissianik allaffissornikkut aqutsineq inissiaatileqatigiiffiup 1995-mi tigummagu, inissiat aserfallatsaaliornissaannut iluarsaannissaannullu aningaasanik immikkoortitsisoqarsimanngitsoq.
Kiisalu aamma SIK-p piumasaqarnera tunngavigalugu inissianut akiliutit 1997 -miit 2001-mut qaffatsaaliorneqarput.
Taamani naliliisoqarpoq, inissianik tamanut iluarsaanissamut 2,4 milliardit koruunit pisariaqartinneqartut.
Taamaammat INI ineqarnermut akiliutip 15 procentia tikillugu qaffannissaannik ilimasaarivoq, qaffaanissat ukiumi tulliuutumi atuutilertussallutik.
INI taamani neriorsuivoq, aningaasat pissarsiarineqartut ilaatigut aserfallatsaaliuinermut atorneqassasut.
Tamatumunngali taamani Naalakkersuisunut siulittaasuusup, Hans Enoksenip, akissutigaa,
INI-mi immikkut ittumik ataatsimeersuarnissamut aggersaaneq, akiliutinik qaffaanissamik ilimasaarutaasut unitsinniarlugit. Tassa akiliutinik qaffaanngitsoorneq aamma alla.
Taarsiullugu piginneqatigiiffimmi aningaasartuutinik apparsaasoqassasoq, naalakkersuisut piumasaraat.
Taamaattorli taamani ineqarnermut naalakkersuisuusoq, Kim Kielsen, isumaqarpoq, inissianut akiliutit qaffatsaaliorneqarsimanerat kukkunerusimanngitsoq.
- Suliluunniit naalakkersuisuunngikkallaratta naalagaaffimmit tigugatsigulli, akit aalajangersorneqarsimapput. Taavalu sukkaatsunnguamik qaffakkiartuaarneqarlutik. Taamanikkut immaqa sukumiinerusumik ingerlanneqarsimasinnaasimagaluarpoq, kisianni oqarusuppunga, pissutsit inuillu akissaaqarteqarernat allallu qimerloornqartariaqarput, Kim KIelsen taama oqarpoq.
Kisianni tassa 2009-mi qinersisoqarpoq, Kim Kilsenilu naapertorlugu taamanikkut naalakkersuisuusut misissuinerat Naalakkersuisunngortut ineqarnermut politikkiminni atunngilaat.
