Jens B. isornartorsiuinermut akissuteqarpoq

Sisimiuni pingasunik inissialiornissaq pillugu suliariumannittussarsioreernerup kingorna Namminersorlutik Oqartussat taamaatitsiinnarnerat, taassuma isornartorsiorpai.
Taama aalajangiisoqarnera pissutaalluni Ilulissani Qaqortumilu assingusunik illuliortitsinissaq aamma kinguartinneqarpoq.

Taamatut kinguartitsisoqarnera Ane Lone Baggerip akuersaaruminaatsippaa, Ilulissani inuussutissarsiuteqartut eqqorneqarlunnissaat ilaatigut oqaatigalugu.
Sanaartornermi atorfiit 200-uusimariarlutik maanna 60-iinnanngorsimanerat Ane Lone Baggerip ilaatigut taakkartorpai, Ilulissani sanaartortoqarnerunissaa piumasaralugu.

Jens B. Frederiksenilli Ane Lone Bagger akissuteqarfigaa. Inissaaleqisoqarnera pissutaalluni sanaartortitsisoqartoq oqaatigalugu.

- Inissaaleqineq pissutigalugu inissianik sanaartorpugut, aammalu inuit suliassaqartinniarlugit inissianik atorfissaqartinneqanngitsunik attartortinneqarsinnaanngitsunillu sanaartunngilagut, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq.

Sisimiuni sanaartortitsinissaq pillugu suliariumannittussarsiuussisoqarmat, neqeroorutigineqartut akisuallaartutut nalilerneqarput.
- Sanaartornermut akit qaffasissut ineqarnermut akiliutit qaffasinnerinik kinguneqartussaapput, naggataagullu attartortinnissaat ajornakusuulersinnaalluni, Jens B. Frederiksen allappoq.

Ilulissanili, Sisimiunilu Qaqortumilu inissialiortoqarumaarpoq. Sanaartornerilli ataatsimoortillugit tamakkiisumik ataatsikkullu ingerlanneqartussatut neqerooruteqartitsivigineqassapput.
- Sanaartugassat tamakkiisumik suliassatut neqerooruteqartitsiviginerisigut najukkani sanasut piginnaanerisa tamakkiisumik atorluarneqarsinnanissaat neriuutigaarput. Suliassat ataatsimut neqerooruteqartitsivigineqarnerisigut entreprenørit suliassamut ataatsimut amerlanerusunulluunniit neqerooruteqarsinnaapput, taamatullu entreprenørit suleqatigiiffinni neqerooruteqartussanik pilersitsisinnaallutik, Jens B. Frederiksen oqarpoq.