Martin Møller: Ujakkaarluni unamminissani qilanaarigaa
Kalaallip Martin Møllerip sapaatip akunnerata siuliani nuannini pissutigalugu OL-imi ujakkaarnissani siulleq peqataaffiginngitsoortariaqarsimavaa.
Tallimanngornermulli unnuaani timini piareersutut misigigamiuk sisoraatini ujakkaarutini atisinnaanngoqqippai, olympiaderfimmilu 15 kilometerimut kiisami unammeqataalluni.
- Sisoraqqissinnaalerama assorsuaq nuannaarpunga, uummaarillungalu, 37-nik ukiulik Martin Møller KNR-imut taama oqarpoq.
AAMMA ATUARUK Vi kan være stolte af Laila og Martin
AAMMA ATUARUK Martin Møller unamminissamut siullermut peqataalinngitsoq
Kalaaleq sisorartartoq normu 90-iulluni naatsorsuutamitut apuuppoq.
- Angusara naammagisimaarpara, taanna oqarpoq.
Martin Møller tullianik februaarip 24-anni unammeqataassaaq. Tamatuma tungaanut nuannermi nalaani angumerinngisani angummaffiginiarniarpai.
- Nuannera qaangereerakku maanna sungiusassaanga. Sungiusarnerusinnaanngorpunga, taava sapaatip akunnerata tullia naalerpat, unammisussannguleruma eqqissisimaalaaqqaarumaarpunga, Martin Møller oqarpoq.
AAMMA ATUARUK Martin Møllerip OL-imi unammeqqaarneranit assit takukkit
Pyeongchangimilu sungiusarfissat pitsaalluinnarput.
- Anorlilaarpoq. Pissutsit ajunngeqaat aputigissaarlunilu, sisorartartoq oqarpoq. Unammeqqinnissami tungaanut aamma kalaaleqatimi Laila Sallingip Nunatta nalunaaqutaa naapertorlugu sapaatiuppat unnukkut unammisussap isiginnaarnissaanut Møller piffissaqarusuppoq.
Martin Møller februaarip 24-anni pikkoriffimmini 50 kilometerimut qangatoorluni unammissaaq. Tassa ungasissuseq taanna maannamut OL-imi 2014-imi angusaqarfigisaasa pitsaanersaat, tassani normu 45-ngorami.
- Anguniangaavoq ukiut sisamat matuma siornatut angusarissaarnissaq, tassani unammilluaqaanga, anguniakkalli qaffasissuunissaat pingaaruteqartoq, Møller oqarpoq.
AAMMA ATUARUK Martin Møller OL-imi unamminermini kingulliit ilaanniittoq