Martin Møller OL-imi unamminermini kingulliit ilaanniittoq

Ujakkaartartoq nunatsinneersoq Martin Møller, Danmark sinnerlugu unammeqataasoq, Pyeongchangimi OL-ertoqarnerani unammeqqaarnermini siulliullutik apuuttut ilaginngilaat.

37-nik ukiulik Martin Møller OL-imi unamminissani sioqqullugu napparsimavoq 15 kilometerinullu fristilimik unamminermi normu 90-inngorpoq, pitsaanernit minutsinik arfinilingajannik arriinnerulluni.

Ukiut sisamat matuma siorna OL-ertoqarnerani 15 kilometerinut unamminermi Martin Møller normu 58-inngorpoq. Ujakkaartartulli misilittagartuup napparsimasimanini eqqarsaatigalugu angusani naammagisimaarpaa.

AAMMA ATUARUK OL aappassaanik peqataaffigalugu qasukkarsimanarneruvoq

- Aallartilluarpunga aamma sisoraatikka iluaraakka. Naatsorsuutigisannit pitsaanerusumik ingerlaarpunga, tamannalu naammagisimaarpara.

- Unammineq sakkortuvoq, peqqinnerulaalersimanissara neriuutigigaluarakku, sapaatilli akunnerata tulliani peqqissisimassallunga qularinngilara, Martin Møller taama oqarpoq.

Peqqinnerulernissaminullu piffissaqarluarpoq. OL-eqarneranimi ullormi kingullermi februaarip 24-ani aatsaat unammeqqittussaavoq, tamatumuuna 50 kilometerinut klassiskimik unammissalluni.

Tour de Skimi sisamariarluni pissartaasimasoq Dario Cologna ullumi tallimanngornermi unamminermi kuultinnattuuvoq.

Schweizimiu Norgemiumit Simen Hegstad Krügerimit sekundinik 18-inik sukkanerulluni apuuteqqaartuuvoq bronzennattorlu tassaavoq ruslandimiu Denis Spitsov, OL-ip erfalasua atorlugu unammeqataasoq.

/ritzau/