Japanimiu ilisimatusartoq Siorapalummi sikukkut nakkartoq
Kalaallit Nunaanni Politiit japanimiup 56-inik ukiullip nunaqarfiup Siorapaluup eqqaani sikukkut nakkarsimanerani novembarip ulluisa 29-anni pingasunngornermi nalunaarfigineqarput.
Pigaartut pisortaat, Malik Olesen paasissutissiivoq.
Japanimiu ilisimatusartoq immap sikuata annikilliartorneranik ilisimatusariartorluni nunaqarfimmiittoq pineqarsimanissaa ilimanartoq, tusagassiuutit ExplorersWeb taama allaaserisaqarpoq.
Siorapaluup Qaanaap avannaata kitaaniippoq, taanna 41-nik innuttaasoqarluni nunatsinni najugaqarfiusuni avannarpasinnerpaavoq.
Tusagassiuutit naapertorlugit Siorapalummi innuttaasut 56-inik ukiulik sikumukaqqusimanngikkaluarpaat. Japanimiorli ilisimatusartoq issittumi misissuinermik ilisimasaqarpoq, Kalaallit Nunaanni Politiillu oqarnerat naapertorlugu angut ullaarnganiit sikumukartoq takuneqarsimavoq.
Angut ualisoq uteqqinngimmat Siorapalummiut ujaasilerpoq. Tassanilu siku putulik nassaaraat nalunaarutiginnillutillu.
Sumiiffimmi misissueqqissaarnermik aallartitsisoqarpoq, misissuinerillu ajutoortoqarsimanissaannik takussutissiipput.
Angut nassaarineqanngilaq, politiillu angutip toqusimanissaa ilimagaat.
Angutip qanigisai nalunaarfigineqareersut politiit paasissutissiipput.
