Japanimi Shinzo Abep toqutaanera Japanimiut quaarsaarutigaat

Japanip premierministererisimasaata Shinzo Abep tallimanngormat toqutaanerata kingorna Japanimiut aliasullutillu quaarsaaqqaqaat.

Maannakkut Japanimi premierministeriusup Fumio Kishidap toqutsineq nalunaarutigileramiuk attortisimaqaaq:

- Utoqqatserpunga, kisianni oqaasissaalatsivunga, taanna oqarpoq toqutsinerlu “isumakkeerfigineqarsinnaanngitsutut” ”naakkittaatsuliorlunilu iliuuseqarnertut” taavaa.

Fumio Kishidap Abep angerlarsimaffia ullumi arfininngornermi pulaarpaa ilaqutaanut misiginneqataanini takutikkiartorlugu. 

Nunarsuarmiut misiginneqataasorpassuit

Arfininngornermi nunarsuarmi siuttut Tokyomi nunanut allanut ministereqarfimmut tutsiuttuarput misiginneqataanerminnik ersersitsiniarlutik.

USA-mi præsidenti Joe Biden oqarpoq Abep toqutaanera ”quaarsaarnarluinnartuusoq mamiatsannarlunilu aliatsannarluinnartoq” 

Taamatuttaaq Kinami præsidenti Xi Jinping misiginneqataalluni tutsiuppoq, tamannalu alianarluinnartuunerarlugu, taamatullu aamma Koreap kujalliup præsidentiata toqutsineq ”akuerineqarsinnaanngilluinnartutut” oqaasertalerpaa.

Tokyomi politiit ullumi arfininngornermi toqutsisutut pasisaq 41-nik ukiulik kinarpiaanersoq paasiniarlugu suli ulapputigaat.

Angut Abemik aallaannilluni toqutsisuulluni nassuerpoq, taamaaliornerminullu peqqutaanerarsimavaa, suliniaqatigiiffimmut assortuussutaasumut aqqanik oqaatigineqanngitsumut, japanimiulli tusagassiorfii naapertorlugit upperisarsiornermut attuumassuteqartumut Abe attaveqartarsorineqarnera toqutsinermut patsisaasimasoq. Taama tusagassiorfik Ritzau allappoq.

Japanip premierministererisimasaa Shinzo Abe illoqarfiit ilaanni Narami oqalugiartilluni aallaaneqarluni toqunneqarpoq.

Shinzo Abe Japanimi premierministeriusartuni sivisunerpaamik premierministeriunertut atuuppoq.