Japanimi piginneqataassutit 1987-imili aatsaat taama appariaateqartigisut
Piginneqataassutinik aktianik nunani tamalaani niuffaffiit ataasinngornermi nalorninartorsiorfiupput, piginneqataassutillu ataatsimut isigalugit naleerukkiartorlutik.
Japan assersuutissaqqippoq, tamaanimi aktiaatit nalingi 12,4 procentinik appariaateqarput, 1987-imili Sorte Mandagimik taallugu aatsaat taama appariaateqartigalutik.
Nutaarsiassaqartitsivik AP taama allappoq.
USA-mi suliffiit ikileriarsimanerat pillugit kisitsisit sapaatit akunnerata siuliani saqqummiussat pissutaaqataallutik nunani tamalaani aningaasarsiorneq nalorninartorsiorfiulerpoq.
Aktiaatit pillugit kisitsisit USA-mi niuffaffinneersut saqqummiunneqareersullu aktiaatinik Danmarkimi niuffaffimmi C25 Indeksimik taaguuteqartumi aktiaatit 2,5 procentinik appariaateqarput, 2022-mi novembarimili aatsaat taama appariaateqartigalutik.
Aningaasarsiorneq pillugu immikkut ilisimasallip Per Hansenip, Nordnetimeersup, oqarnera naapertorlugu nunani tamalaani aningaasarsiorneq piffissami qaninnermi kigaallakkiartuaarsinnaavoq, USA-miluunniit aningaasarsiorneq ilimagisamit ingerlalluarpallaarunnaariartoratarsinnaalluni.
