Jakob Ellemann-Jensen politikkimit tunuartoq

Jakob Ellemann-Jensen partiip Venstrep siulittaasuatut, Danmarkillu aningaasaqarnermut ministeriatut tunuarniuteqarpoq.

Jakob Ellemann-Jensen tusagassiortunut ataasinngornermi ullaap tungaani katersortitsinermi taama ilisimatitsivoq.

Politikkimiillu tunuavinnini aamma nalunaarutigaa.

Jakob Ellemann-Jensen, uippakajaarnini pillugu qaammaterpaalunni sulinngiffeqareerluni sapaatit akunneri qulit matuma siornatigut suleqqilerpoq, politikkimiillu maanna tassa tunuavinniarluni.

Uippakajaarnini pillugu sulinngiffeqalernermi siornatigut illersornissamut ministeriugaluarpoq, suleqqileramili aningaasarnermut ministerinngorluni.

Venstremili ilaasortat amerlasuut Jakob Ellemann-Jensen siulittaasutut piffissami kingullermi iluariunnaarsimavaat.

Qinersisartunillu isumasiuinerit kingulliit takutippaat partii Venstre ullumi qinersisoqartuugaluarpat 10 procentit ataallugit qinersiseqassagaluartoq.

Ellemann-Jensenillu tunuarniuteqarneranut tamanna ilaatigut pissutaavoq:

- Venstrep naalakkersuisoqatigiinni angusai uannut tutsinneqarsinnaasut miserratiginagu oqaatigisinnaavara. Venstrelu siuariartoqqissappat allatut pisoqartariaqarpoq. Tamannalu tunualiaqutaralugu Venstrep siulittaasuatut tunuarpunga, Jakob Ellemann-Jensen oqarpoq.

Partii Venstre nuna tamakkerlugu novembarip qiteqqunerani ataatsimeersuassaaq, nutaamillu tassani siulittaasussarsiortoqassalluni.
Venstrep siulittaasuata tullia Stephanie Lose ataatsimeersuarnissap tungaanut siulittaasuugallassaaq, Troels Lund Poulsenilu illersornissamut aningaasaqarnermullu ministeriugallassalluni.

Jakob Ellemann-Jensen Venstremi ukiuni sisamani siulittaasuusimavoq.