Qaammatini arfinilinni napparsimalluni sulinngiffeqareerluni: Jakob Ellemann-Jensen marlunngorpat sulileqqissasoq
![](/sites/default/files/styles/image_934x467/public/article_images/20190809-154538-l_38mb.jpg?itok=1Kj9d7bU)
Aqagu marlunngornermi aggustip aallaqqaataanni Venstrep siulittaasua, Jakob Ellemann-Jensen, qaammatini arfinilingajanni napparsimalluni sulinngiffeqareernermi kingorna sulileqqissaaq.
Ataasinngornermi Statsministeriaqarfik tusagassiorfinnut nalunaarummi taama allappoq.
Taamaasilluni Ellemann-Jensen illersornissamut ministeritut ministeriunerullu tulliattut danskit naalakkersuisuinut utissaaq.
Taanna uippakajaarnermik eqqugaanini pissutigalugu februaarimili napparsimalluni sulinngiffeqarsimavoq. Siornatigullu nammineq nalunaarutiginikuuaa aggustip aallaqqaataanni sulileqqikkumaarluni.
Napparsimalluni sulinngiffeqarnerani Stephanie Lose aningaasaqarnermut ministeritut atuuffeqartoq Troels Lund Poulsen illersornissamut ministeriusimavoq.
Jakob Ellemann-Jensenili sulileqqippat sulianik annertuunik arlalinnik isumagisassaqarpoq, ilaatigut sakkussanik pisiortornissamut suliaq pillugu.
Jakob Ellemann-Jensen milliardinik nalilinnik qamutilinnik pisinissaq tuaviuunniarlugu Folketingimut qanoq ililluni paasissutissanik eqqunngitsunik tunniussaqarsimasinnaanera pillugu internettikkut tusagassiorfiup Altingetip allaaserisimavaa.
Pilersuisut israelimiut kiisalu assortuussutaasup Elbitip saniatigut pilersuisunit allaninngaanniit neqeroorutinik aallertoqarsimagunannginnera tassani isornartorsiorneqarpoq.
Partiip Venstrep iluani aammattaaq eqqissiviliilliortoqarlunilu pitsaanngitsunik isumasiuisoqarpoq.
Tamanna ilutigalugu 2030-mut annertuumik pilersaarusiortoqartussaavoq aamma Venstremut pingaaruteqartoq nunalerinerup iluani CO2-mut akitsuut suliarineqassaaq, danskillu naalakkersuisuinut aningaasanut inatsisissatut siunnersuut saqqummiunneqartussaalluni.
Suliat taakkua tamarmik Jakob Ellemann-Jensenip Venstre tunuliaqutigalugu sunniuteqarfigilluarnissai anguniartussaassavaa.