Danmarkimi ministerinngortut nutaat ilisaritinneqartut
![](/sites/default/files/styles/image_934x467/public/article_images/20221215-105002-l-5456x3640ma.jpg?itok=UakpEi6P)
Danmarkimi ministerit nutaat dronning Margrethemut kunngissaq Frederimmullu nunatta nalunaaqutaa naapertorlugu ullaaq manna nalunaaqutaq arfineq-marlunut ilisaritinneqarput.
Katillugit 23-t Socialdemokratit, Venstre Moderaternelu sinnerlugit ministerinngorput.
Politikererlu misilittagartooq, Kalaallit Nunannut Savalimmiunullu tunngasuni, nunanut allanut tunngasunut ministereqarfimmi ilaatigut suliaqalissaaq.
Ministeriunerusimasormi, partiimilu Moderaternemi maanna siulittaasoq Lars Løkke Rasmussen, nunanut allanut tunngasunut ministerinngussaaq.
Løkke Savalimmiormiumik nuliaqarpoq, ministeriunertullu misilittaqarluarluni, naalagaaffeqatigiillu iluanni pissutsinut ilisimasaqarluarluni.
Illersornissamut ministeri Kalaallit Nunannut pingaaruteqartoq
Kalaallit Nunaannut pingaarutilittut ministeri nutaaq tassaavoq illersornissamut ministerinngortoq, Venstrep siulittaasua Jakob Ellemann-Jensen, taanna ministeriunerup tullersortaatut aamma inissippoq.
- Europami maanna sorsuttoqarpoq, illersornissaqarfillu ukiuni kingullernut naleqqiullugu pingaaruteqaleraluttuinnarpoq, Jakob Ellemann-Jensen oqarpoq.
Illersornissamut sillimaniarnermullu tunngasut Kalaallit Nunaanni politikkikkut sulinermi pingaaruteqaleraluttuinnarput, illersornissamullu isumaqatigiissut nutaaq Folketingip aappaagu 2023-mi isumaqatigiinniutigisussaavaa.
Illersornissaqarfiup, Issittoq tassunga ilaalluni, ukiumut 18 milliardit koruuninik ukiuni tulliuttuni aningaasaliineruffiusalernissaa pilersaarutaavoq.
Mette Frederiksenip siullermik ministeriunerunerani aningaasarsiornermut ministeri Nicolai Wammen, aningaasarsiornermut ministeritut ingerlaannassaaq. Aningaasanullu inatsisissatut siunnersuutit Folketingimi Siumut Inuit Ataqatigiillu taamaasilluni ilaatigut isumaqatigiinniarfigisartussaallugit.
Isumaginninnermut ministerinngortup Pernille Rosenkrantz-Theilip, Socialdemokratineersup, kalaallinut Danmarkimiittunut tunngasuni aamma suliassaqarluarpoq, soorlu aamma sulisoqarnermut ministerinngortoq Ane Halsboe-Jørgensen taamaattussaasoq.
AAMMA ATUARUK Mette Frederiksenip Venstret Moderaatillu naalakkersuisooqatigilerai
Aaujuku ministerinngortut:
Mette Frederiksenip aappassaanik ministeruninngornerani ministerit:
1) Ministeriuneq Mette Frederiksen (Socialdemokratit)
2) Ministeriuneruptullersortaa, illersornissamullu ministeri Jakob Ellemann-Jensen (Venstre)
3) Nunanut allanut tunngasunut Lars Løkke Rasmussen (Moderatit)
4) Aningaasaqarnermut ministeri Nicolai Wammen (Socialdemokratit)
5) Aningaasarsiornermut Troels Lund Poulsen (Venstre)
6) Nunamut namminermut peqqissutsimullu miinisteri Sophie Løhde (Venstre)
7) Inatsiseqarnermut ministeri Peter Hummelgaard (Socialdemokratit)
8) Kultureqarnermut ministeri Jakob Engel-Schmidt (Moderatit)
9) Inuussutissarsiornnermut Morten Bødskov (Socialdemokratit)
10) Ineriartortitsinermut suliani, silallu pissusaa pillugu nunani tamalaani politikki pillugu ministeri Dan Jørgensen (Socialdemokratit)
11) Avatangiisinut ministeri Magnus Heunicke (Socialdemokratit)
12) Isumaginnermut ineqarnermullu ministeri Pernille Rosenkrantz-Theil (Socialdemokratit)
13) Sulisoqarnermut ministeri Ane Halsboe-Jørgensen (Socialdemokratit)
14) Meeqqanut ilinniartitsinermullu ministeri Mattias Tesfaye (Socialdemokratit)
15) Nunanit allaneersunut akuulersitsiniarnermullu ministeri Kaare Dybvad Bek (Socialdemokratit)
16) Akileraartarnermut ministeri Jeppe Bruus (Socialdemokratit)
17) Inuussutissanut, nunalerinermut aalisarnermullu ministeri Jacob Jensen (Venstre)
18) Ilageeqarnermut, nunap immikkoortuinut, nunanoilu avannarlerni suleqatigiinnermut ministeri Louise Schack Elholm (Venstre)
19) Angallannermut ministeri Thomas Danielsen (Venstre)
20) Ilinniartitaanermut ilisimatusarnermullu ministeri Christina Egelund (Moderatit)
21) Digitaliseerinermut naligiissitaanermullu ministeri Marie Bjerre (Venstre)
22) Utoqqarnut ministeri Mette Kierkgaard (Moderatit)
23) Silap pisssusianut, nukissiuuteqarnermut pilersuinermullu ministeri Lars Aagaard (Moderatit)