Jacob Aqissiaq Møllerip arnaa: Soorunami tulluusimaaqaanga
- Soorunami tulluusimaartorujussuuvunga. Jacob ikinngutinilu ingerlalluarmata amerikamiunullu pinnguaammik unammisartunut pikkorinnerpaanut unammimmata tulluusimaartorujussuuvunga.
19-inik ukiullip, Jacob Aqissiaq Møllerip arnaa, Lone Nukaaraq Møller oqarpoq.
Jacob Fortnitertartut iligiit nunarsuarmi pikkorinnerpaat 23-t akornanni pissartanngorniuunnermi 9-nngorpoq. Unammeqattaarnerit FNCS Amerikap avannaani ingerlanneqarput, iligiinniillu 100-nit 24-t ajugaaniutivinnissamut ingerlaqqillutik.
Jacob Aqissiaq Møllerip iligisaatalu normu 9-nngornerat 81.000 koruuninik aningaasartaqarpoq.
- Kisimiilluni tamanna angunngilaa, iligiiupput iliuusissaminnillu pilersaaruteqarlutik, tamannalu iluatsippaat. Tamanna tulluusimaarutigeqaara, Lone Nukaaraq Møller oqarpoq.
Meeqqat qarasaasiatigut pinnguaateqartartut tapersersorsigit
Lone Nukaaraq Møllerimmi ernerata takutitaa Jacobip ikinngutaasa ataatsimut takutitaat ilaanngikkaluarpat ajornarsimassagaluarpoq. Jacobip ikinngutini pingasut Nuummiit ilagalugit Washingtoniliarlutik najugaqariartuutigalutik pinnguaammik unammiartorput.
Lone Nukaaraq Møllerip angajoqqaat allat meeqqami qarasaasiap saaniinnginnissaannut kaammattuinatik qarasaasiatigut pinnguaatigisartagaannut soorlu Fortnitertarnerannut tapersersuisarnissaat kaammattuutigaa.
AAMMA ATUARUK Kalaaleq Fortnitertartoq normu 9-nngortoq
- Uagut inersimasut qarasaasiaqarnerup silarsuaanut, inuusuttut inuuffigisaannut inissinniarnissarput pingaaruteqarpoq. Uagut inersimasut peroriartorfigisatsinnit allaanerujussuuvoq, Lone Nukaaraq Møller oqarpoq.
Tassungalu ernimi ineeqqamit anisinnissaa ilaatigut aamma pingaaruteqartarsimavoq.
- Killiliinissaq minnerunngitsumillu piumasaqaateqarnissaq pingaaruteqangaatsiarsimavoq. Jacobimut atatillugu pinnguaateqartarneranut killiliinissaq tamatumalu saniatigut ukiukinnerunerani timersuuteqartinnissaa ilinniakkamillu aallussinissaa pingaaruteqarsimavoq, Jacobip arnaa oqarpoq.
Washingtonimi internettimut attavik sukkanerusoq
Jacob Aqissiaq Møller taassumalu ikinngutai pingasut septembarimi Washingtoniliarput, unammeqattaarnerminnilu angusarissaarlutik.
Inuusuttut sisamat Washingtonimut nuunneranni pissutaasoq ataasiinnaavoq. Tassa internettimut attaveqaatit internetti aqqutigalugu qarasaasiatigut pinnguaateqartarnermut atatillugu nunatsinni neqeroorutigineqartartumit pitsaanerullutillu aalaakkaanerupput.
E-sportertarnullu nunarsuarmi unammersuaarnermut peqataaniartunut internettimut aalaakkaasumik sukkasuumillu attaveqarnissaq pingaaruteqartorujussuuvoq. Millisekundinnguaq ajugaanermik ajorsarnermilluunniit kinguneqarsinnaavoq. Nuannaarutaasinnaavoq imaluunniit pakatsissutaasinnaavoq.
AAMMA ATUARUK Nukappissat Nuummeersut: USA-mi Fortnitemik iluatsitsilluartut
Fortnite qarasaasiatigut pinnguaataavoq, tassani inuit 100-it qeqertami aallaasilisarlutik allanillu sakkoqarlutik unammissapput. Unamminermi annattut ajugaasarput.
Jacobip ikinngutaa, Marcus Steenholdt unammeqattaarnermi allanik iligisaqarluni aamma peqataavoq, taakkuli sapaammi unammersuarnissamut anngutinngillat.
