Kalaaleq Fortnitertartoq normu 9-nngortoq

19-inik ukiulik, Jacob Aqissiaq Møller Nuummeersoq Amerikap Avannaani Fortnitertartut 23-t pikkorinnerpaat akornanni ajugaaniunnermi ajunngilluinnartumik angusaqarluni normu 9-nngorpoq.
Kalaaleq 19-inik ukiulik Fortnitemik pinnguaateqartartoq, Jacob Aqissiaq Møller unammeqatigisartakkanilu USA-mi FNCS-imi sapaatiummat ajugaaniutiveqataavoq. Assi © : Jacob Aqissiaq Møller / Twitch
Allattoq Malik Brøns
decembarip 09-at 2019 08:33
Nutserisoq Connie Fontain

Kalaaleq Fortnitemik unammersuarnermi normu 9-nngornermini 81.000 koruunit missaannik aningaasannappoq.

Kalaaleq 19-inik ukiulik Fortnitemik pinnguaateqartartoq, Jacob Aqissiaq Møller unammeqatigisartakkanilu USA-mi FNCS-imi sapaatiummat ajugaaniutiveqataavoq.

Pissannganartumillu unamminerup kingorna Jacob unammeqatigisaalu pikkorinnerpaat qulit akornanniimmata kalaaleq nuannaarluarpoq.

- Immaqa aningaasartaqarpoq, Jacob unamminerminnik Twitchikkut toqqaannartumik aallakaatitsisoq oqarpoq.

AAMMA ATUARUK Nukappissat Nuummeersut: USA-mi Fortnitemik iluatsitsilluartut

Fortnite qarasaasiatigut pinnguaataavoq, tassani inuit 100-it qeqertami aallaasilisarlutik allanillu sakkoqarlutik unammissapput. Unamminermi annattut ajugaasarput.

FNCS-imi unammeqattaarnerit sapaatip akunnerata naanerani ingerlanneqarput, unammeqattaarnerillu aallartinneranni holdit 100-it peqataapput.

Jacobip ikinngutaa, Marcus Steenholdt unammeqattaarnermi allanik iligisaqarluni aamma peqataavoq, taakkuli sapaammi unammersuarnissamut anngutinngillat.