Nukappissat Nuummeersut: USA-mi Fortnitemik iluatsitsilluartut

Qarasaasiakkut pinnguaat, Fortnite ukiuni kingullerni inuusuttut akornanni nuannarineqangaatsiarpoq. Fortnite meeqqat inuusuttuaqqallu nunarsuarmi tamaaniit millionilikkaat ullut tamaasa pinnguaatigisarpaat.

Marcus Steenholdt taassumalu ikinngutai pingasut USA-mi illoqarfissuarmit, Washington D.C-mit kujammut 15 minuttimik ungasitsigisumi qarasaasiatigut pinnguaatersornerminni toortaatinik musimillu, musimut ilitsivimmi, ilitsivigisartakkatsinnit pingasoriaammit anginerusumiittumik toortaapput.

Inuusuttut taakku illoqarfeeqqami Fort Washingtonimi 20.000-it missaannik innuttaasoqartumi najugaqarput. Nukappissat septembarip qeqqani USA-liarput, qaammatinilu pingasuni USA-miissinnaatitaallutik.

Marcusip ikinngutaatalu pingasut Washingtonimut nuunnerannut pissut ataasiinnaavoq.

Millisekundi ajugaanermik ajorsarnermillu kinguneqarsinnaasoq

Internettimut attavik internettikkut pinnguaateqarnissamut atatillugu nunatsinni neqeroorutaasumit pitsaanerullunilu aalaakkaaneruvoq.

- Attaveqaammi kinguaqqanngitsumi qanoq angusaqarsinnaanerluta misileerusuppugut, taamaammat pissarsiarisinnaasatsinni periarfissat pitsaanerpaat anguniarlugit serverimut qaninnerpaamut pitsaanerusumut qanittuaranngorluta nuuppugut, Marcus Steenholdt oqarpoq.

Internetti atorlugu pinnguaatersoraanni serverimit sorlermeersuunerluni apeqqutaasarpoq. Serveri tassaavoq programmi atuisunut, matumanilu pinnguaammik atuisunut tunioraasinnaasoq.

Serverit taakku nunarsuarmi sumiiffinni assigiinngitsuni inissisimasinnaapput. Nunatta aaqqissuussaanikkut inissisimaffia imaatigullu Islandimut Amerikallu avannaanut attaviit pissutigalugit europamiut amerikallu avannaanimiut serveriisigut pinnguaatersortoqarsinnaasarpoq.

Sumiiffinnili taakkunani attaviit nikerarsinnaasarput.

E-sportertarnullu nunarsuarmi unammersuaarnermut peqataaniartunut internettimut aalaakkaasumik sukkasuumillu attaveqarnissaq pingaaruteqartorujussuuvoq. Millisekundinnguaq ajugaanermik ajorsarnermilluunniit kinguneqarsinnaavoq. Nuannaarutaasinnaavoq imaluunniit pakatsissutaasinnaavoq.

Aningaasarpassuit ajugaanermi iluanaarutigineqarsinnaasut

Marcusimulli ikinngutaanulli maannamut nuannaarnerinnaavoq.

- Tamatta ingerlalluarpugut, aningaasanik eqquilaarpugut, Marcus Steenholdt oqarpoq.

Taassuma maannamut 10.000 dollarsit missaat tassa 67.000 koruunit missaat ajugaasarnerminni iluanaarutigereerlugit oqaatigaa.

Taakkuli unammersuaarnissamut angupput, tamanna sapaatip akunnerata naanerani decembarip arfernani aallartinneqassaaq. Amerika avannarlermi unammisartut eqimattat 2500-t akornannit Marcus ikinngutinilu Jacob maannamut normu 8-tut inissisimapput, sapaatip akunneratalu naanerani 1-nngorniuutissallutik.

E-sportimik ingerlataqartartut timersuutinut allanut sanilliullugit ajugaanermit aningaasannattaamminnik aningaasanillu tapersersortiminnit pissarsiaminnik inuussuteqartarput. Marcus ilaalu IT-lerinermik suliffeqarfimmit Nuummeersumit, Modulomit aningaasatigut tapersersorneqarput.

- IT-lerinermik suliffeqarfiuvugut, IT-lerinermik ineriartortitsinissamut ilinniartitseqqinnissamullu soqutiginningaatsiartut, pissutigalugu IT-lerisut amigaataapput. Taamaammat IT-lerisunik nassaassagutta sumi ujaasissaagut? Qarasaasiamik atuisuni, pinnguaatersortartuni qarasaasianillu mikinerminniit pinnguaqartuni ujaasissaagut, taamaammat soorunami aterput taakkununnga ikinngutaannullu ilisimatikkusupparput taamaalillutik ilinnialernissaq eqqarsaatigilersinnaavaat, Modulomi pisortaq, Katrine Helena Petersen oqarpoq.