Ivaaraq pillugu suliami eqqartuussineq: Angut 62-inik ukiulik pineqaatissinneqartoq

Ivaaraq pillugu suliami oqallisaaqisumi ullumi eqqartuussisoqarpoq. Suliaq taanna arnap innarluutillip siorna erneriataarneranut tunngasuuvoq.

Arnamik taassuminnga pinngitsaaliisimasutut unnerluussaq angut 62-inik ukiulik ukiuni marlunni qaammatinilu qulingiluani pineqaatissinneqarsimasunut inissiisarfimmiittussanngortitaalluni eqqartuussaavoq.

Eqqartuussiveqarfik Kujalleq Qaqortumiittoq ullumi aalajangiiviuvoq. Arnaq pinerlineqartoq innarluuteqartut angerlarsimaffianni Ivaaqqamiittuuvoq, Eqqartuunneqartoq tassani taamani sulisuuvoq.

Eqqartuussivimmi killisiorneqarnermini Laban Kristoffersenip, arnamik arlalinnik innarluuteqartumik eqqarsartaatsimigullu ajoqutilimmik 2021-mi juullip ukiortaallu akornanni marloriarluni kinguaassiuutitigut atornerluisimalluni, oqaatigaa.

Arnaq septembarip aappaani 2022-mi ernertaarpoq.

Taarsiissutit 150.000

Unnerluussisup piumasaraa angutip ukiuni marlunni qaammatinilu qulingiluani pineqaatissinneqarsimasunut inissiisarfimmiittussanngortinnissaa, arnaq 22-nik ukioqaraluarluni pinerlineqarnermi nalaani, innarluutini arlallit pillugit meeqqatut isigisariaqarmat.

Illersuisulli piumasaraa ukiumi ataatsimi qaammatinilu qulingiluani pineqaatissinneqarsimasunut inissiisarfimiittussanngortinneqassasoq arnaq ukiuni pillugit inersimasutut isigisariaqarmat.

Eqqartuussisut unnerluussisup kaammattuutaa malippaat. Soorlu eqqartuussisoq oqartoq, Laban Kristoffersenip marloriarluni atornerluisimanini nassuerutigaa.

Eqqartuussisup aamma oqaatigaa, pineqaatissiineq sivikillineqarsinnaanngitsoq, pingaartumik arnaq pisut kinguneranit qanoq naalliutsigisimanera eqqarsaatigigaanni.

Immikkut unnersuussisup Lars Petersenip aalajangiineq naammagaa. 

- Naammagaara. Eqqartuussiviup kingunerititassanik nalilersuinerminni uagut piumasagut malillugit aalajangiipput. Tassa suliaq ilungersunarluinnartutut isigigatsigu taama pineqaatissinneqarnissaanik kaammattuivugut, KNR-imut oqarpoq. 

Unnerluussissummi allanneqarsimasut malillugit pinerlineqartumut 80.000 koruuninik taarsiissuteqartussatut angut pineqaatissinniarneqaraluartoq, kisianni unnerluussisussaatitaasup piumasaraa angut arnamut 382.000 koruuninik taarsiissuteqassasoq, marloriarluni pinngitsaaliilluni kinguaassiuutitigut atornerluisimaneranut tamanut immikkut 150.000 koruunit aamma ernereernermi kingorna arnap akornutigiligarisaanut 82.000 koruunit.

Illersuisup 80.000 koruuniunissaat tunngavilersoraluarpaa.

Eqqartuussivilli aalajangerpaa taarsiissutissat 150.000 koruuniussasut.

Laban Kristoffersenip suliaq nunatta eqqartuussivianut suliassanngortitseqqippaa, tassanngaanniillu pineqaatissinneqarnerup sivisussusia pissusissamisoornersoq nalilersorneqassaaq. Angut eqqartuussaq politiit suli tigusareqqavaat, tassaniissaarlu nunatta eqqartuussiviata aalajangiinissaata tungaanut.

- Eqqartuussaasoq Nunatta Eqqartuussivianut ingerlatitseqqinnissaminik aalajangiimmat, angut tigummigallarneqassaaq. Nunatta Eqqartuussiviata qanoq sukkatigisumik aalajangiinissaa apeqqutaalerpoq, Lars Petersen oqarpoq. 

Aqutsisoq: Aalajaatsuuvoq

Laban Kristoffersen sassartinneqarnermini oqaluttuarpoq Ivaaqqami unnuaanerani pigaartartutut taamani sulisuulluni.

Oqarpoq, tassanngaannaq tiingarusuummersimalluni, utaqqisinnaannginnamilu, nalunngikkaluarlugu kingunerlussinnaasoq, piumatsannini maliinnarsimallugu.

Unnuarsioqataa suligaluartoq, ineqartunut kaajallaanermini suleqatini ilagisimanngilaa.

Ivaaqqami pisortaq, Sussi Larsen, ilisimannittutut eqqartuussivimmi sisamanngornerup ullaap tungaani apersorneqarpoq.

Oqarpoq, Laban Kristoffersen, sulisutut taamani aalajaatsuusoq, tatiginarmallu arlaleriarlugu sulisorisarsimagitsik.

Imminut annersartoq

Aamma oqaatigaa, arnaq arlalinnik innarluuteqaraluarluni nuannaartuusoq talinilu atorlugit nikilaarsinnaasartoq. Arnaq nangeqartuuvoq, nerisinneqartartuulluni oqalussinnaananilu. Maluginiarsimavaali arnap oqaatigineqartut amerlanersaat paasisinnaasarai, Sussi Larsen nassuiaavoq.

Arnaq angerlarsimaffimmi Ivaaqqami 2008-mi najugaqalerpoq.

Arnaq pinerlineqarnermi kingorna puallarsimavoq. Arnaq saluppallaaqimmat imerpalasumik proteindrikkimik nalinginnaasumik iisaqartinneqartaraluarpoq, puallarmalli unitsinneqarsimalluni.

Pissusaa aamma taamani allanngorsimavoq, imminut tilluusartittuinnanngorluni annersartarluni, Sussi Larsen nassuiaavoq.

Sussi Larsenip 2022-p aasaanerani sulinngiffeqareerluni arnaq taamanikkut 23-nik ukioqartoq pissusilersornermigut allanartoq paasivaa. Isai sungaartissimapput. Sulisullu nakorsamut sianeqquneqarput.

Nakorsaq oqarpoq, immaqa quumi aqqutaagut aseruuttoorsimasoq. Kialluunniimmi naartunera pasitsaatinngilaa. Allaammi isumaqartoqarpoq tingulluttunngorsimassasoq.

Arnaq arlalinnik innarluuteqartoq eqqarsartaatsimigullu ajoqutilik, allatut nipiliortalersoq septembarip aappaani maluginiarneqalerpoq, sunaaffami erniffissaa nallertoq.

Arnaq peqqinngippaseqimmat, Sussi Larsen suliartoqquneqarpoq.

Napparsimmavimmut unitsinneqarpoq.

Nalunaaquttallu akunnerup ataatsip missaa qaangiummat ernertaarpoq.

Sussi Larsen oqarpoq, arnaq ullumikkut peqqinngeqisoq. Arnarli ngsteqalersimavoq ersituunngorsimalluni. Annilaangasarami kisimiikkusuttanngilaq. Pissusinnguani pissuseriunnaarsimavaa.

Toqqissisimaqqilernerminili nalaani arnaq nuannaartartoq oqaatigineqarpoq.