Ivaaraq: Angutip 62-inik ukiullip ukiuni pingasungajanni pineqaatissinneqarsimasunut inissiisarfimmiittussanngortinnissaa unnerluussisup piumasaraa
Angut 62-inik ukiulik politiinit siorna novembarimi tigusaavoq, arnamik pinerliinerup nalaani 22-nik ukiulimmik arlariinnillu innarluutilimmik pinngitsaaliilluni atoqateqarsimasutut pasineqarluni.
Kinguninngua eqqartuussivimmut sassartinneqarnermini angut pineqartoq innarliinermut pisuusutut nassuerpoq. Maanna suliaq eqqartuussivimmit suliarineqalerpoq. Tamannalu pissaaq Qaqortumi Eqqartuussiveqarfik Kujallermi.
Unnerluussissutip takutippaa angut pineqartoq qaammatip aappaata affap ingerlanerani, tassalu 2021-mi novembarip qeqqaniit 2022-mi januaarip aallartinneranut, arlaleriarluni arnaq pinngitsaalillugu atoqatigisarsimagaa, naak arnaq taanna eqqarsartaatsimigut kinguarsimanini qaratsamigullu pisumik nukillaarsimanini pissutigalugit pinngitsaalineqarnerminut akerliliisinnaanngikkaluartoq.
Taamaammat politiit aallaqqaataaniilli suliaq pinngitsaaliilluni atoqateqarsimanertut isigalugu paasiniaavigaat.
Naartunera arlaannaannilluunniit malugineqanngilaq
Pinngitsaaliilluni atoqateqarnerup kingorna qaammatit qulingiluat qaangiunneranni 2022-mi septembarimi arnaq arlariinnik innarluutilik ernertaarpoq, DNA-millu misissuinermi meeraq aamma angut unnerluussaasoq paasineqarput DNA-mikkut assigiiffeqartut, tamatumalu kinguneranik 62-inik ukuilik novembarimi tigummigallagassanngortinneqarpoq.
Inuit arnap maanna 23-nik ukioqartup eqqaaniittartut arlaannaalluunniit naartuneranik pasitsanngillat. Taamaammat erninera tamanut annilaarnaqaaq. Arnaq innarligaanikoq oqalussinnaanngilaq, taamaallaat paarngorsinnaalluni nangeqartariaqarlunilu.
Unnerluussissut ersarippoq
Sisamanngornermi suliaq aallartippat, immikkut unnerluussisuusup Lars Petersenip unnerluussissut naapertorlugu piumasariniarpaa unnerluussaasoq ukiuni marlunni qaammatinilu qulingiluani pineqaatissinneqarluni eqqartuunneqassasoq aammattaarlu unnerluussaasoq ukiuni tallimani tarnikkut timikkullu innarluutilinnik sullissisinnaanerminik arsaarneqassasoq.
Saniatigut unnerluussisup piumasaraa innarligaasoq 80.000 koruuninik taarsiivigineqassasoq.
