Ittoqqortoormiit neruminneranit imarortoq

Februaarimi kiassiortut ilagaat Ittoqqortoormiini silasiorfimmi sulisoq Erik Pedersen.

- Februaarip qaammataani imarorsimanngisaannarpugut. Eqqumiittorujussuuvoq imaq sikoqanngitsoq isigalugu tamaanilu angallattut puisinniartulluunniit takullugit. Ukiup taamaalinerani taamaanngisaannaraluarpoq, Erik Pedersen oqarpoq.

Ittoqqortoormiini februaarip qaammataani pisarnermit arfineq-pingasunik kiannerusimasoq DMI-p kisitsisaataani takuneqarsinnaavoq.

Tunup ilatsiarsua, tassa Kap Morris Jesupimit Aputiteeq tikillugu, nerumissimalluni.

AAMMA ATUARUK Avannaarsua Naalagaaffeqatigiinni arfininngormat unnukkut kiannerpaaffiusoq

Silaannaap nunanit kiattunit avannarparterneranit Tunu naliginnaasumit kiannerulersimasoq silasiortup Trine Pedersenip DMI-imeersup nassuiarpaa.

- Silaannarmik kiattumik avannarpartertoqarneratigut Qalasersuup eqqaa ukiup taamaalinerani aatsaat kiannerulersinnaavoq. Kaperlammammi seqinermit kissassinnaanngilaq, silannarmillu tamaanga nuuttoqarneratigut aatsaat neruminnerulersinaalluni, Trine Pedersen oqarpoq.

Station Nordimi pisortaq Jesper Hansen februaarip naajartornerani kiassioqataasut ilagaat. Kaperlakkaluartoq pisarnermiimmi aqqanilinnik kiannerusimavoq.

- Suli kaperlattoq kiappoq. Eqqumiikujulluni quianakujuppoq, Jesper Hansen oqarpoq.

AAMMA ATUARUK Qalasersuaq kiangaatsiartoq