Avannaarsua Naalagaaffeqatigiinni arfininngormat unnukkut kiannerpaaffiusoq

Kalaallit Nunaanni anori immikkuullarissoq matumani pissutaasoq silasiortup oqaatigaa:

Københavnimi arfininngormat unnukkut minus 5 gradep missaanik issittoq uuttortarneqarpoq. Tamannalu ilutigalugu nunarsuarmi silamik uuttortaaviit avannarpasinnerpaartaani Kap Morris Jesupimi tassa nunatta avannarpasinnerpaartaani arfinillit missaanik kiattoq uuttortarneqarpoq, tamanna nalaagaaffeqatigiinni arfininngornermi unnukkut kiannerpaatut oqaatigineqarsinnaassaaq, Savalimmiullu kiannerup tulleralugu.

AAMMA ATUARUK Qalasersuarmi issangiarnialerunartoq

Nunarsuarmi silap qanoq inneranik uuttortaaviit avannarpasinnerpaartaata uuttortaanerani kiangaatsiaraluartoq februaarimi aatsaat taama kiatsiginngilaq. Kiannerpaagami 7,8 grademik kiattoq, DMI-p silasiortua, Jesper Eriksen Twitterimi allappoq.

Taanna naapertorlugu kiannera sumiiffiup minusinik isseriarluni arfininngornerup unnukkuani nunasarnerneranik peqquteqarpoq.

AAMMA ATUARUK Qalasersuaq kiangaatsiartoq

Anori Sermersuaq aqqusaareeraangamiuk kiatsittarpoq, DMI nittartakkamini nassuiaavoq.
 
DMI naapertorlugu 1980-imiilli aatsaat sisamassaat plusimik kiannera Avannaarsuani uuttortarneqarpoq. Siullermik 2011-mi, tullissaani 2017-imi plusimillu kianneri kingulliit marluk marlunngormat arfininngormallu unnukkut uuttortarneqarput.
Kap Morris Jesupimi februaarip qaammataani agguaqatigiissillugu minus 32,9°C-mik issittarpoq.