Ittoqqortoormiini akiuussuserneqarnissamut neqeroorfigineqartut 88 procentii kapitittut

- Ajunngilluinnarpoq.

Nakorsaaneq, Henrik L. Hansen tunumi siullermeertumik Modernamit akiuussutissanik kapuisoqareersoq taama oqarpoq.

Ittoqqortoormiini 18-ileereersimasut tamarmik akiuussutissamik kapitinnissamut sisamanngornermi neqeroorfigineqarput, tamannalu 247-it akueraat.

- Ittoqqortoormiini kapuisoqarnerani tapersiilluartoqarpoq. Akiuussutissamik kapitissinnaasut 88 procentiisa missaat kapitipput, Henrik L. Hansen oqarpoq.

- Naartusut akiuussuserneqarnissamik neqeroorfigineqarsinnaanngitsut kapitinngitsunut ilaapput. Ilorrisimaarnarluinnartumik inerneqarpoq.

Tusatsiakkat eqqunngitsut Facebookikkut ingerlaartut

Nunatsinni coronamik akiuussusersuisoqarnerani piffissap kingulleq ilungersunarsimagaluarpoq. Coronamummi akiuussuserneqarsimasumik taqqamik milittoortoqarluni toqusoqarsimaneraalluni eqqunngitsumik Facebookikkut siammarterisoqarpoq.

Nakorsaanerullu tusatsiakkat taakku ilumoortortaqannginnerarlugit sisamanngormat oqaaseqarpoq.

Kangerlussuarmi nunatsinnut avataanit isaaffiusumi sapaatip akunnerata siuliani kapuisoqarpoq. Tassani 16-ileereersimasut tamarmik covid-19-imut akiuussuserneqarnissamut neqeroorfigineqarput. 

AAMMA ATUARUK Nakorsaaneq: Tusatsiakkanik eqqunngitsunik siammarteriunnaarlusi

Nakorsaanertulli – tamat akiuussuserneqarnissaat kissaatigigaanni kisitsisit pitsaanngillat. 50-it 60-illu akornanni ukiullit 71 procentiinnaat akiuussutissamik kapitipput.

Ittoqqortoormiini akuersisoqarnerunissaanut suna pissutaava?

- Oqaatigiuminaappoq, kisianni Ittoqqortoormiini piareersaasoqarnikuuvoq. Uku (tusatsiakkat eqqunngitsut aaqq.) amerlasuut eqqunnginnerat paasissutissiissutigineqarpoq, Henrik L. Hansen oqarpoq.

Inuusuttut 16-ileereersimasut utaqqisariaqartut

Ittoqqortoormiini inersimasut 18-ileereersimasut akiuussuserneqarnissamut kisimik neqeroorfigineqarpoq. Tassanilu Modernamit akiuussutissaq atorneqartut inuusuttunut 16-ileereersimasunut akuerisaannginnera pissutaavoq.

16-ileereersimasut tamarmik akiuussuserneqarnissaat pilersaarutaavoq. 18-it ataallugit ukiullit qaqugu kapitinnissaat naatsorsuutigineqarsinnaava?

- Akiuussutissat qanoq ittut nunatsinnut anngunnersut apeqqutaalluinnarpoq. Modernamit akiuussuissap nunatsinni atoruminarnerunera pissutigalugu taassuma pissarsiarineqarnissaa salliupparput.

AAMMA ATUARUK Coronamut Tunumi akiuussutissalersuisoqalertoq

- Taanna taamaallaat 20-nik nillissuseqartumiitsinneqaannarsinnaavoq, akiuussutissarlu Pfizerimeersoq 80-inik nillissuseqartumiitsinneqartariaqarluni, Henrik L. Hansen oqarpoq.

Ittoqqortoormiini 16-init 17-inut ukiullit ukioq manna januaarimi aqqaniliupput.

Tasiilami apriilip maajillu ingerlanerani aamma akiuussusersuisoqassaaq.