Coronamut Tunumi akiuussutissalersuisoqalertoq

Tunumiut coronamut akiuussutissalerngaarneqarnissamut aqagu sisamanngornermi periarfissaqassapput. 

Tunumi Ittoqqortoormiinik 18-ileereersimasunik coronamut akiuussutissalersuisoqaqqaassaaq. 

Timersortarfimmi ullaakkut nalunaaqutaq qulingiluaniit ulloq naallugu taamaaliortoqassaaq. Akiuussutissalersuinissanut piffiussaliussat uani takusinnaavatit. 

Coronamut akiuussutissamik aqagu ornigullutik kapitikkiartornissaat pingaaruteqartoq, Namminersorlutik Oqartussat ilisimatitsipput. Coronamummi Ittoqqortoormiinimi 2021-mi ataasiaannarluni akiuussutissalersuerngaartoqassasoq, Namminersorlutik Oqartussat ilimagaat.

Modernap akiuussutissaliaa atorneqassaaq. 

Coronamut Kujataani nunaqarfinni taavalu illoqarfinni Narsami, Nanortalimmi Arsummilu akiuussutissalersuinerit sapaatit akunnerata uani siulianilu aamma pipput.

Qeqertarsuarmi Qasigiannguanilu sapaatit akunnerata tulliani akiuussutissalersuisoqassaaq. 

Akiiuussutissalersikkusuttut tamarmik aggustiutinnagu kapitereersimassasut

Tasiilami apriilimi maajimilu aamma akiuussutissalersuisoqassaaq – akiuussutissanillu naammattunik nunatsinnut nassiussisoqarsimappat Qaanaarmiut aamma akiuussutissalersorneqarumaartut, Nunatsinni Nakorsaaneqarfik ilisimatitsivoq. 

Nunatta sinnerani aasaru akiuussutissalersuisoqassaaq – akiuussutissalersikkusuttullu tamarmik aggustiutinnagu kapitereersimassasut, nunatta nakorsaanera Henrik L. Hansen naliliivoq. 

Akiuussutissalersinnissamilli maannamut akuersisimasut ikippallaarput.

AAMMA ATUARUK Nakorsaaneq ernumasoq: Kangerlussuarmi kapuisoqarnerani inuusuttut affaannaat akuersisut

Kangerlussuarmi nunatsinnut avataanit isaaffiunerpaasumi sapaatip akunnerata kingulliup siuliani akiuussutissalersuisoqarpoq. Tassanilu innuttaasut 16-ileereersimasut tamarmik covid-19-imut akiuussutissamik kapitinnissamik neqeroorfigineqarlutik.

Nakorsaanertulli – tamat akiuussuserneqarnissaat kissaatigigaanni kisitsisit pitsaanngillat. 50-it 60-illu akornanni ukiullit 71 procentiinnaat akiuussutissamik kapitipput.

Inuusunnerusuni tamanna pitsaanerunngilaq. Inuusuttummi 20-t 30-llu akornanni ukiullit affaannaat akiuussuserneqarput.

- Sumiiffinni assigiinngitsuni annikinnerusunik nappaalasoqaleraluarpat akiuussuserneqarsimasut ikippallaarujussuarput, Henrik L. Hansen KNR-imut sapaatit akunnerata siuliani oqarpoq.

AstraZenecap akiuussutissaliaa Danmarkimi atorneqarunnaarallartoq

Modernap akiuussutissaliaa Pfizer-Biontechillu akiuussutissaliaaat nunatsinni atorneqarput. Taakku arlaannaalluunniit taqqamik milittoornermik kingunerluuteqartitsisinnaasorineqanngillat. 

AstraZenecalli akiuussutissaliaa taqqamik milittoornermik kingunerluuteqartitsisinnaasorineqarpoq. 

AAMMA ATUARUK Akiuussutissaq AstraZeneca Danmarkimi atorneqarunnaartoq

Taamaammat perulunnermik nassuaruminaatsumilli kingulerluuteqaataasarnera peqqutigalugu Danmarkimi atorneqarunnaarallassasoq, danskit peqqinnissamut aqutsisoqarfiat aalajangerpoq. Tassa imaappoq, Danmark Europami nunani akiuussutissamik taassuminnga atuiunnaartuni siullerpaavoq.

Akiuussutissallu nunatsinnut tikittut Danmarkimeersuummata, nunatsinni maannamut suli atorneqanngilaq.