Akiuussutissaq AstraZeneca Danmarkimi atorneqarunnaartoq

AstraZenecamit akiuussutissaq danskit akiuussusersuinissamut pilersaarutaanit peerneqarpoq.

Tamanna peqqinnissamut aqutsisoqarfiup pisortaata, Søren Brostrømip tusagassiuutinut nalunaarummi uppernarsarpaa.

Danmark nunarsuarmi nunani siulliulluni akiuussutissamik atuiunnaavittuni siulliuvoq.

- Nappaalasoqarnerata nalaani covid-19-imut akiuussutissamik sunniuteqarluartumik pissarsiarineqarsinnaasumillu atuinnginnissamut aalajangerneq ajornaatsuinnaanngilaq. Akiuussutissanilli allanik pissarsiarisaqarsinnaavugut, nappaalasoqarneralu nakkutigilluarlutigu, Søren Brostrøm tusagassiuutinut nalunaarummi allappoq.

AAMMA ATUARUK AstraZeneca atorneqarnissaanut Danmarkimi peqqissutsimut aqutsisoqarfik innersuussinngilaq

Nakorsaateqarnermut aqutsisoqarfimmi immikkoortortami pisortap, Tanja Erichsenip Europami Nakorsaatinut Aqutsisoqarfiup (EMA) akiuussutissamut atatillugu pitsaaquteqarlunilu ajoquteqarneranik naliliinera isumaqatigineqartoq tamatuma saniatigut paasissutissiissutigaa.

Akiuussutissaq ataatsimut isigalugu covid-19-imik napparsimasoqarneranut katsorsaanermut qularnaallunilu sunniuteqarluartoq, Tanja Erichsenip tusagassiortunik katersortitsinermi oqaatigaa.

AstraZeneca nunatsinni atorneqarnikuunngilaq.