Itsarsuaq inuusimasut ilisimaneqanngitsut saarnginik Filippinerini nassaartoqartoq

Itsarnisarsiuut itsarsuaq inuusimasut kigutaannik assaannit, isigaannit quttoraasalu saarnginik, ukiut 50.000-it 67.000-illu akornanni pisoqaassussilinnik nassaarput, tuluit nutaarsiassaqartitsiviat BBC taama allaaserisaqarpoq.

Itsarsuaq inuusimasut taaguuteqartinneqarput, Homo Luzonensis, taakkua saarngisa sinneri kigutaallu Filippinerit qeqertaasa annersaanni Luzonimi nassaarineqarmata.  

Felix Riede, Aarhusip Universitetiani itsarnisarsiuuni professorip nassaarineqartut nuannaarutigivaa, inuit oqaluttuarisaanerannut nutaanik tapiliussisoqarmat.  

- Nutaanik nassaartoqarnera tupinnartuuvoq, inuit ineriartornerannut pingaartumik ukiut 100.000-it kingulliit eqqarsaatigalugit.   

- Itsarsuaq inuusimasut sinnerinik nassaartoqarnera kulturikkut ineriartorfiussaaq maannakut inuit homo sapiensit timikkut angissusiannit minnerusunik, Felix Riede oqarpoq.

/ritzau/