Italiami angerlarsimaffinni nalliuttorsiorneq inerteqqutigineqartoq
Italiami naalakkersuisut coronavirusip Italiami tuniluutileqqinnerani siaruatsaaliniarlugu killilersuinerit sukannernerulersippaat.
Aamma imerniartarfiit neriniartarfiillu unnuap qeqqanut matusalissapput, angerlarsimaffinnilu nallittorsiornerit inerteqqutigineqalerlutik.
Tamanna inassummi, Italiap ministeriunerata Giuseppe Contep marlunngornerup unnuaani atsiugaani, allaqqavoq.
Italiami nutaarsiassaqartitsiviit ilaat, Ansa, taama allappoq.
Taamaammallu katittoqartillugu ilisisoqartillugulu inuit katersuuttut 30-nit amerlaneroqqusaanngillat.
Aamma ilaqutaariit ikinngutiminnik ilaquttaminnilluunniit pulaartoqarnerminni qanermut assiaquteqarnissaat inassutigineqarpoq.
AAMMA ATUARUK Colosseum juunip aallaqqaataani ammaqqissasoq
Italiamilu naalakkersuisut inuit neriartoqqusisannginnissaat najugaqatiginngisaminnillu katereqateqarnermi amerlanerpaamik arfiniliusarnissaat inassutigaat.
Atuartullu katerillutik aamma nuannaariaqqusaajunnaarput.
Coronavirusip Italiami tuniluutileqqinnerani malittarisassat nutaat ulluni 30-ni atuutissapput. Coronavirusimik Italiami tunillatsissimasut amerlisimammata killilersuinerit sukannernerulerseqqinneqarput.
Coronavirusi Italiami tuniluutilermalli nunami tassani inuit coronavirusimik tunillatsissimasut maannamut 359.569-iusut, coronavirusimillu toqquteqartut 36.205-iusut nalunaarsukkat kingulliit takutippaat.
Coronavirusip Italiami tuniluutileqqinnerani siaruatsaaliniarlugu silami qanermut assiaquteqarnissaq Italia tamakkerlugu sapaatit akunnerata siuliani inassutigineqareersorlu malittarisassat nutaat atuutilerput.