IT-mut pisortaq suliffimminit peersitaq Sermersuumit taarsiivigineqarnissamik suliami ajorsartoq
Taamaammat kommunip it-mut pisortamik Michael Williamsimik atorfianit peersitsinera ajunngilaq, eqqartuussiviup allattuivia KNR-imit pissarsiarineqartoq naapertorlugu eqqartuussisut taama aalajangiipput.
It-mut pisortaasimasoq, Michael Williams, kommunimut taamanikkullu aningaasaqarnermut sulisoqarnermullu pisortamut Lars Møller Sørensenimut ilumoorfiginninngitsumik iliuuseqarnini pissutigalugu Kommuneqarfik Sermersuumit 2014-imi atorfimminit peersitaavoq.
Pisortaasimasup aningaasaqarnermut pisortaq qanitanik salliutitsinerarlugu sakkortuumik pisuutitsinera, pisuutitsinerminillu suliffeqarfiup iluani saqqummiusseqqaarani Ombudsmandimut Transparency Greenlandimullu nassiussisimanera pissutigalugu kommunimut ilumoorfiginninngitsumik iliuuseqarnera pisortap peersitaaneranut kommunip tunngavilersuutigaa.
Pisuutitsineit tunngavissaqanngitsut
Michael Williamsip peersitaanini tunngavissaqannginnerarpaa 105.000 koruuninillu taarsiivigineqarnissani piumasaqaatigalugu. Qanitanik salliutitsineraanini tunngavissaqarluarnerarpaa, ilaatigullu Transparency Greenlandimut saaffiginnissuteqarnerminut pasitsaassaqarnini pisortanilu sulisut killiligaanatik oqaaseqarsinnaanerat innersuussutigai.
Nunattali Eqqartuussisuuneqarfiani eqqartuussisut ukioq manna septembarip aqqaneq-aappaanni naliliipput pisuutitsinerit Michael Williamsip Ombudsmandimut Transparency Greenlandimullu nassiussai tunngavissaqanngitsut.
Aamma Transparencymut Ombudsmandimullu allagaqannginninnermi Michael Williams suliffeqarfiup iluani saqqummiusseqqaarsimasariaqarsoraat.
Nunatta Eqqartuussisuuneqarfiani eqqartuussisut tamanna pissutigalugu aalajangerpaat it-mut pisortaasimasoq whistlebloweriunani pisortarisaminut ilumoorfiginninngitsumik iliuuseqarsimasoq.
Michael Williams suliap ingerlanneqarnerani aningaasartuutit 25.000 koruuniusut taamaalilluni akilertussanngorpai.
