Isumaqatigiissut nunatsinnut pisussaaffiliisoq Hammond isumaqarpoq
Isumaqatigiissummi koruunit 235 millionit Issittumi suliniutinut nutaanut ukiut arfinillit ingerlaneranni qulakkeerneqarput.
- Nunatsinni illersornissamut aningaasaliisarnermi kalaallit aatsaat taama annertutigisumik akuutinneqartussanngornerannik aningaasaliineruvoq, folketingimut ilaasortaq Aleqa Hammond oqarpoq.
AAMMA ATUARUK Sakkutuujutitat nunatsinniissinnaalissasut
Sakkutuujusussaatitaasut sakkutuujusussaanertik nunatsinni siunissami atorsinnaanngussagaat, danskit naalakkersuisuisa illersornissaq pillugu isumaqatigiissutaanni sapaammi atsioqatigiissutigineqartumi ilaavoq.
Nunatsinni upalungaarsimanissamut ilinniarsinnaanissaq ilaatigut isumaqatigiissutigineqarpoq:
- Tamannalu inuusuttortatsinnut siunissami aamma illersornissaqarfiup ingerlanneqarneranut akisussaaqataanerulernissaanik aqqutissiussineruvoq.
Inuit Ataqatigiit sinnerlugit folketingimut ilaasortap, Aaja Chemnitz Larsenip, isumaqatigiissut aamma nuannaarutigigini sapaammi oqaatigaa:
AAMMA ATUARUK Politiit qarasaasiakkullu isumannaallisaaneq illersornissaq pillugu isumaqatigiissummi nukittorsarneqartut
- Kalaaliulluni kajumissutsimik sakkutuujunerup Danmarkimut aallaqqaartariaqarnani atornissaa Nunatsinni upalungaarsimanissamut ilinniarsinnaalerneq immikkut maluginiagassaasoraara, Aaja Chemnitz Larsen oqarpoq.
Isumaqatigiissut 2023-p tungaanut atuuppoq, Aleqa Hammondilu isumaqarpoq isumaqatiginninniaqqinnissamut tamanna iluaqutaassasoq:
- Isumaqatigiissut una nunarsuarmi eqqissiviilliornernut akiuiniarnernullu, qallunaat peqataaffigisaannut, samminerugaluarpoq. Taamaattorli isumaqarpunga nunatsinnut ilanngullugu angusaasut ajoriinnagassaanngitsut alloriarnerillu pingaaruteqartuusussaapput, tullissaanik isumaqatigiinniarnissamut nukittoqutigisatsinnik nassataqartuusoq.
