Sakkutuujutitat nunatsinniissinnaalissasut
Allaaserisaq 29/1 2018 aamma 1/2 2018 nutarterneqarpoq, illersornissaq pillugu isumaqatigiissuteqarnermi Sakkutuut Ulluata Nunatsinni eqqunneqarnissaa sakkutuujunngitsunillu upalungaarsimaniarnermi ilinniartitaanermik nutaamik pilersitsisoqarnissaa pillugu paasissutissanik ilaneqarluni. Allaaserisami siullermi tamanna erseqqissumik oqaatigineqanngilaq.
Illersornissaq pillugi isumaqatigiissutip nutaap ilaatut, kalaalit inuusuttut Danmarkiliaqqaanngikkaluarlutik Illersornissaqarfimmi sakkutuujusussaanermut nammineq kajumissutsiminnik nalunaarsinnaanngussapput.
Inuusuttut Nunatsinni Sakkutuut Ulluanni sakkutujuusussatut nalunaarsinnaanngussapput - aamma siornatigut "sessionimik" taaneqartartoq.
Tamatuma saniatigut Nunatsinni nammineq kajumissutsimik upalungaarsimasussanut ilinniartitaanermik pilersitsisoqassaaq, ilaatigut imaatigut annaassiniarnermik suliaqartussamik, taanna Issittumi Sakkutooqarfiup ataaniissaaq.
Tamannalu Inuit Ataqatigiit sinnerlugit folketingimut ilaasortap, Aaja Chemnitz Larsenip nuannaarutigaa.
- Saqqummiussagut amerlasuut illersornissaq pillugu isumaqatigiissummut ilanngunneqarnerat nuannaarutigisorujussuuara, taanna oqarpoq, nangillunilu.
- Kalaaliulluni kajuminnermik sakkutuujunerup Danmarkimut aallaqqaartariaqarluni atornissaa pinnagu Nunatsinni illersornissamut ilinniarsinnaanissaq (upalungaarsimaniarnermi ilinniartitaaneq, aaqq.) immikkut maluginiagassaasoraara, Aaja Chemnitz Larsen oqarpoq.
Inuit Ataqatigiit "Issittumut isumannaatsumut anguniagassat qulit" siorna saqqummersippaat. Siunnersuut taanna illersornissamut ministerimut, partiillu illersornissamut oqaaseqartartuinut Aaja Chemnitz Larsenimit saqqummiunneqarput. Illersornissaqarfiup sumiiffinniit peqataaffigineqarnissaa siunnersuummi pingaartinneqarnerpaat ilaanniippoq.
AAMMA ATUARUK Politiit qarasaasiakkullu isumannaallisaaneq illersornissaq pillugu isumaqatigiissummi nukittorsarneqartut
Isumaqatigiissummi amigaataasut
Nunatta nutaamik assiliorneqarnissaanut tapersiissutit, sakkutuujutitat nunatsinneersut angerlamut angalanissaannut tapersersuineq, imaani ajornartoornermi radiukkut atassuteqaammut aningaasaliineq inuttalersuinerlu isumaqatigiissutigineqartumi ilaapput.
- Isumaqatigiissutigineqartoq ataatsimut isigalugu iluarisimaarpara. Kisianni soorunami mianernartunik suliassaqarpoq sulissutigiinnagassanik, Aaja Chemnitz Larsen oqarpoq.
AAMMA ATUARUK Sakkutuujusussaanerup Nunatsinnut atuutsinneqarnissaa itigartitsissutigigaat
Nunatsinni suliassanik naammassinninnissamut atortussanik amigaateqartupilussuusoq illersornissaqarfimmit oqaatigineqareersoq, Aaja Chemnitz Larsenip oqaatigaa.
- Soorlu nakkutilliineq unammillernartorujussuuvoq. Qaammataasianik amerlanernik piniaraanni akisoorujussuussaaq, taannalu uani isumaqatigiissummi eqqarsaatigineqarsimanngilaq, taanna oqarpoq.
Issittumili Sakkutooqarfimmut ukiumut 120 millionit koruuninik immikkoortitsisoqarpoq, tamannalu Aaja Chemnitz Larsenip iluarisimaarpaa.
- Ajunngilluinnartoq isumaqarpunga, taanna oqarpoq.
