Issittup imartaa aatsaat taama sikuunngitsigisoq

Norsk Polarinstituttimi ilisimatusaat nutaaq pillugu Norgemi tusagassiorfik NRK.no taama allaaserisaqarpoq.
 
Imaata sikuata aakkiartornera ilisimatuunit aatsaat mianersoqqussutigineqalinngilaq.
 
Ilisimatusaammili nutaami imaata sikuata aakkiartornerata sukkatsikkiartuinnarneranut pissutaasut arlallit paasineqarput.

Ilisimatuut issittup imartaata sikuata qaammataasamit 1985-imi assiliortoqarnera ukioq manna assilisanut assersuussimavaat, aatsaallu taama sikuunngitsigisoq paasisimallugu.

AAMMA ATUARUK Sikuiuitsup Kujalliup imartaani aatsaat taama sikuunngitsigaaq

Ilisimatuullu naapertorlugit imaata sikuata annertusiartuinnartup nutaajunera tamatumunnga pissutaanerpaavoq.
 
Ima paasillugu, siku nutaaq annertusiartuinnarpoq ukiorpassuarnilu sikuusimasoq milligaluttuinnarluni.
 
Sikullu pissusaat assigiinngitsuunerat ajornartorsiutitaqarpoq. Sikumi nutaajutilluni tarajukinnerusarpoq, sikumullu pisoqaanerusumut naleqqiullugu sukkanerusumik aakkiartortarluni.

AAMMA ATUARUK Immap sikua annikilliartuinnarpoq

- Tamannalu imminik sakkortusaataasumik sunniuteqarpoq. Sikoqarpiannginnerami sikumik nutaajunerusumik pilersitsisarpoq, sikulu taanna sikup annertunerusup aakkiartorneranik kinguneqartarluni, ilisimatooq misissueqataasoq Sebastian Gerland NRK-mut taama oqarpoq.
 
Ilisimatusaammi aamma paasineqarpoq siku saannerulersimasoq. Aamma siku aputikinnerulersimavoq, tamannalu pissutigalugu sikup qaleriissitaarneri ikinnerulerlutillu annikinnerulersimapput.
 
Tamakkulu pissutigalugit imaata sikuata siammarnera annikilligaluttuinnarpoq.