Issittumi Sakkutooqarfiup umiatsiaq ujaarineqartoq nassaaraa
Issittumi Sakkutooqarfiup angutit pingasut Qeqertamit umiatsiamik arfininngormat Ilulissiartut tammaaneqartullu ataasinngormalli ujaarivai.
Immakkut silaannakkullu ujaasisoqarpoq. Umiarsuaq alapernaarsuut Lauge Koch, illersornissaqarfiup timmisartua Challenger, Air Greenlandillu qulimiguuliutaa ulluni kingullerni ujaasipput.
Suliamullu atatillugu ippassaq pingasunngornermi pisoqarpoq.
Timmisartoq Challenger umiatsiamik kivisimasumik, sulili puttasumik, umiatsiamut ataasinngormalli ujaarineqartumut assingusumik sumiissusersipput. Umiatsiaq Qeqertarsuup kujataani nassaarineqarpoq.
- Eqqumaariffigeqqissaarparput maanna qanigisaasut nalornillutillu misigissutsikkut artorsartut asasaminnillu susoqarsimanerinik paasisaqarusuttut. Taamaattumik ujaasineq nassaariffiup nalaani aqagu ingerlateqqissavarput, kommandørkaptajn Brian Jensen Issittumi Sakkutooqarfimmit oqarpoq.
Ilaqutaasut suliamut atatillugu pisut pillugit ilisimatinneqareerput.
Naak umiatsiaq ujaarineqartoq sumiissusersineqareeraluartoq angutit ujaarineqartut pingasut Issittumi Sakkutooqarfiup suli nassaarinngilai, taamaammat sisamanngornermi qaammarpat ujaareqqissavaat.
- Angutit ujaarineqartut pingasut umiatsiaat sumiissusersineqareeraluartoq ajoraluartumik suli nassaarinnginnatsigit ullumi ujaareqqissavagut. Umiarsuarmik qulimiguulimmillu nassaariffiup nalaani ullup ingerlanerani ujaareqqilissangatippavut, Brian Jensen oqarpoq.
Issittumi Sakkutooqarfiup inuit suliamut atatillugu paasissutissaateqartut Kalaallit Nunaanni Politiinut saaffiginneqquai.Kalaallit Nunaanni Politiit oqarasuaataasa normoraat 70 14 48.
