Isumannaatsuuneq: Issittumi sakkussiorneq pillugu illersornissamut ministeri erseqqissulianngilaq
- Illersornissaqarfiup Issittumiinnera ukiuni tullerni patajaallisarneqassaaq.
Illersornissamut ministeri Trine Bramsen (S) ilaatigut taama Jyllands-Postenimut oqarpoq.
Kisianni Kalaallit Nunaanni eqqaanilu illersornissaqarfiup qanoq pitsanngorsaavigineqarnissaa – assersuutigalugu issittumi umiarsuit sorsuutit, timmisartut imaluunniit qaammataasat amerlanerulissanersut Trine Bramsenip erseqqissarumanngilaa.
AAMMA ATUARUK Danskit issittumi illersornissaqarfiat nukittorsarneqassaaq
- Massakkut aalajangernianngilara. Soorunami piviusunik nalilersuineq kalaallillu qanimut suleqatiginerat tassani aalajangiisuussaaq, KNRimit apersorneqarluni taama oqarpoq.
- Uagut piumasatsinnik Kalaallit Nunaat piumasaqarfiginianngilara, nangippoq. Taarsiulluguli piffissami tulliuttumi Naalakkersuisut tamanna pillugu oqaloqatiginiarpai.
Nakkutilliineq, attaveqaqatigiinneq aamma nakkutiginninneq
Ministeriuneq Mette Frederiksen qanittukkut Kalaallit Nunaanniinnermini oqarpoq sakkutooqarnikkut amerlisaasoqaraluartoq naalagaaffeqatigiit Issittumi saassussiumatuutut inissisimassanngitsut. Nunarsuup ilaa tamanna nangillugu eqqissisimaffiussaaq, erseqqissaavoq.
AAMMA ATUARUK Amerikamiut Issittumi sakkutuui amerlissapput
Kisianni illersornissamut ministeripTrine Bramsenip oqaatigaa Issittumi illersornissaqarfik atorfilitsigoortumik aalajaallisarneqassasoq.
- Pitsaanerulersitassat tassaapput nakkutilliineq, attaveqaqatigiinneq aamma nakkutiginninneq. Assigiinngitsorpassuarnik isikkoqarsinnaavoq, oqarpoq.
Illersornissaqarfik pillugu isumaqatigiissutip 2018-imeersup oqaasertai aamma taama imaqarput. Isumaqatigiissutikkut Folketingip aalajangerpaa Issittumi sullissineq pitsanngorsaavigineqassasoq, ilaatigut qaammatasat atorlugit annertunerusumik nakkutilliinikkut aamma Kalaallit Nunaanni upalungaarsimanissamut ilinniartitsinerup pilersinneratigut.
Milliardikkaanik aningaasaliinikkut Kalaallit Nunaat aamma pissarsissaaq
Illersornissamut ministereqarfik sapaatip akunnerata siuliani nalunaarpoq Issittup illersornissaanut 1,5 milliardit koruunit Folketingip illersornissaqarfimmut 2023-imut aningaasaliissutissanut missingiinermut ukioq manna januaarimi immikkut ittumik aningaasaliissutaasa ilaat atorneqarsinnaasut.
AAMMA ATUARUK Timmisartut malersuutit Kalaallit Nunaanni inissinneqarsinnaanissaat mattunneqanngilaq
1,5 milliardit taakku ilaat qanoq annertutigisut Issittumut atorneqassanersut Trine Bramsenip oqaatigiumanngilaa.
- Tamanna alajangersinnaangilara, tassami ineriartorneq sukkusoorujussuarmik ingerlammat. Ukiuni kingullerni tamanna takuarput. Taamaattumik isumaqarpunga aningaasat siunissamut qaqugorsuarmut sumut atorneqarnissaasa aalajangerneqarnissaat isumatusaarnerunngitsoq.
Taamaattorli siusinnerusukkut aningaasaliinissaq pisariaqartinneqarpat Folketingip 2023-mut utaqqisariaqannginnera ammaffigaa.
AAMMA ATUARUK Borgmesteri: Nunap ikuallannera ilikkagaqarfigaarput
Naalakkersuisut danskillu naalakkersuisui manna tikillugu isumaqatigiipput atorfillit Kalaallit Nunaannersut Savalimmiuneersullu ilaatigut Danmarkimi Forsvarsakademiimi ilinniartinneqarsinnaasut, aamma upalungaarsimanermik suliaqartut Danmarkimi ilinniaqqissinnaassasut.
Naalagaaffiup Kalaallit Nunaanni illersornissakkut qanoq annertutigisumik suliaqanera apeqqutaatinnagu siunissami USA annertunerujartortumik malunnaateqassaaq. Mette Frederiksenip Nuummut tikeraarnermini tamanna erseqqissarpaa.
Taamaattoq Naalakkersuisut imaluunnit danskit naalakkersuisui manna tikillugu suli siunissami USA Kalaallit Nunaata sua’tungaaniissanersoq nalunaarutiginnngilaat. Aamma tamanna illersornissamut ministerip Trine Bramsenip oqaaseqarfigiumanngilaa.
Taarsiulluguli ministeriunerup nalunaarnera ilumoornerarpaa.
- Issittumi suliassat naammassiniarnerini USA aamma ilaassaaq. USA suleqatigisassatut taamaatiinnarneqarsinnaanngilaq. Suliassat naammassineqarnissaannut pingaruteqarput siunissamilu aamma taamaassallutik, KNRimut oqarpoq.
