Illersornissaqarfik: Timmisartut malersuutit Kalaallit Nunaanni inissinneqarsinnaanissaat mattunneqanngilaq

Nutaarsiassaqartitsivik Berlingske taama allaaserisaqarpoq. Timmisartulli pineqartut imaaliallaannarlugit nunatsinni inissinneqarsinnaanngitsut, Trine Bramsenip nassuerutigaa:

- Inissiisoqarnissaa mattunnianngilara, timmisartunimmi inissiisoqarnissaa pisariaqartitsinneqaratarsinnaavoq. Timmisartulli malersuutit Kalaallit Nunaanni inissinneqassanersut inissinneqassannginnersulluunniit politikkikkut aalajangiiffigisassaavoq, illersornissamut ministeri oqarpoq.

AAMMA ATUARUK Amerikamiut Issittumi sakkutuui amerlissapput

Illersornissaqarfiup timmisartuutai Kalaallit Nunaat qulaattarpaat, timmisartulli malersuutit aalajangersimasumik inissisimatinneqanngillat, assersuutigalugu saassussisoqarniarnerani pinngitsoortitsisinnnaassagaluarlutik.

Timmisartut malersuutit Kalaallit Nunaanni inissinneqassappata, timmisartut taamaattut amerlanerit Danmarkip pisiarisariaqassavai, timmisartummi F-35-t 27-t Danmarkip maannamut pisiarisimavai.

AAMMA ATUARUK Danskit issittumi illersornissaqarfiat nukittorsarneqassaaq

Danmarkip timmisartuutai malersuutit Kalaallit Nunaanni inissinneqarsinnaanissaat, Danmarkip illersornissamut taamanikkut ministeriata Claus Hjort Frederiksenip upernaaq manna aalajangiusimavaa.

Illersornissamut ministereqarfimmut ukioq manna aningaasaliissutit katillugit 31,1 milliardit koruuniupput, taakkunannga 1,5 milliardit koruunit immikkut aningaasaliinikkut ilassutaallutik. Taakkunanngalu ilaat Issittup nakkutigineqarnerata nukittorsarneqarnissaanut atorneqassallutik.

KNR-ip illersornissamut ministeri sapaatip-akunnerata siulianili pissarsiariniarsaraa, iluatsinngitsumilli.