Issittumi Ilisimatusartut nunatsinni ataatsimeersuarngaalersut

Nunatsinni siullerpaamik sapaatip-akunnerata tulliani Greenland Science Weekertoqarpat ilisimatusartut nunatsinneersut nunaniillu allaneersut naapissapput. Innuttaasulli peqataanissaminnut aamma periarfissaqarput. Science Week Danmarkimi ukiorpassuarni ingerlanneqartareerpoq, ilisimatusarnermullu aaqqissuussat assigiinngitsorpaaluit Nuummi decembarip aallaqqaataaniit decembarip ulluisa tallimaat ilanngullugu ingerlanneqartussat misigisaqarfiusinnaapput.

Ilaatigut eqalussuup qaamasup 250 kilonik oqimaassusillip Kujataani pisarineqartup paasisaqarfiginerunissaa, takunissaa attornissaalu Pinngortitaleriffimmi periarfissaassaaq.

Katuamilu decembarip ulluisa tallimaat paasissutissiiviussaaq, Issittumilu qimmit qimuttut, silap pissusia, nunap sannaa, robottit, ilinniartitaaneq, peqqissuseq, utoqqaliartorneq allarpassuillu pillugit paasissutissiisoqarumaartoq, aaqqissuisut ilisimatitsissutigaat.

Inuit 200-t missaat peqataassapput, taakkuanilu 123-t nunatsinneersuupput.

Greenland Science Week Ilisimatusarfimmit, Pinngortitaleriffimmit, Greenland Perspectivemit, Kommuneqarfik Sermersuumit Aalborg Universetetimiillu aaqqissuussaavoq.