Politikki Avatangiisit Ilinniarneq

Issittumi ilisimatusarneq sammineqarnerulissasoq

Danskit ilinniartitaanermut ilisimatusarnermullu ministeriat Ulla Tørnæs issittumi ilisimatusarnermut ilinniartitaanermullu iliuusissamik tamanut saqqummiussimmat, Issittup sammineqarnerulernissaa, Danmarks Teknisk Universitetip DTU-p nuannaarutigaa.

Allattoq Anton Gundersen Lihn

novembarip 04-at 2016 10:02

DTU nunatsinnut Issittumullu assigiinngitsorpassuarnik suliaqartarpoq. Universitetip ilisimatuui ilaatigut Nunatsinni mittarfinnik sanaartornermi, aalisarnermik piujuaannartitsinissamut issittumilu pissutsinut tulluarsakkamik qaammataasatigullu aqqutinik iluarsartuussinermi teknologiinik ineriartortitseqataasarpoq.

- Taamaammat ilisimatusarnermi iliuusissami nutaami ukkatarineqarnerulerpat, tamanna DTU-mut inuiaqatigiinnullu pitsaassasoq, DTU-p issittumi sullissiviani Polar DTU-mi pisortap Niels Andersenip oqaatigaa.

- Issittup sammineqarnerulernera nuannaarutigaarput. Issittumi teknologiit nutaat ilisimatusarnerpassuavullu taperserpaat, taamakkulu inuiaqatigiinnut iluaqutissaassapput, Niels Andersen oqarpoq.

Issittumi ilisimatusarnermi ataatsimeersuarnermut atatillugu danskit ministeriata iliuusissaq saqqummiuppaa, DTU-lu timmisartunik inuttaqanngitsunik siunissami uuttortaanissanut nakkutilliinernullu atorneqarsinnaasunik ilaatigut aamma saqqummiussivoq.

Aamma atuaruk Timmisartuaraq inuttaqanngitsoq silap pissussaata allanngoriartornera malinnaaffigissagaa