Københavnimi Kalaallit Illuutaanni qinersisartunik ataatsimiititsineq Issittoq pillugu ministereqarnissaq Løkkep qularaa

Issittoq pillugu ministereqalernissaq ministeriunerup Lars Løkke Rasmussenip isumatusaarnerusorinngilaa. Københavnimi Kalaallit Illuutaanni aaqqissuussami tamanna erserpoq. Aamma nunatsinni innuttaasut nunatsinniit folketingimut qinigassanngortittunik qinersisinnaanissaannut siunnersuut oqallisigineqarpoq.

Københavnimi Kalaallit Illuutaanni ataasinngormat unnukkut ministeriuneq Lars Løkke Rasmussen (V) aamma Inuit Ataqatigiit Folketingimut ilaasortaatitaat Aaja Chemnitz Larsen naapimmata inunnik ulikkaavippoq.

Ataatsimiinneq Inuit Ataqatigiinnit aaqqissuunneqarpoq. 

AAMMA ATUARUK Inuit Ataqatigiit Issittoq pillugu ministerimik toqqaasoqartinniaraat

Takkuttut ilaat tassaavoq Tukummeq Berthelsen Københavnip Universitetiani kandidatinngoqqammersoq. Issittoq pillugu ministereqalernissamut IAp siunnersuutaa pingaartumik soqutigisaraa. 

- Issittoq pillugu ministereqalernissap qanoq imaqarnissaanik paasitinneqarnissara neriuutigaara, aamma massakkut ministeriunerusup atuuffiup tamaattup pilersinnissaa akuersaarneraa tusarusuppara.

Danskit naalakkersuisortaassaanni Issittoq pillugu ministereqalernissamik siunnersuut taassumalu qanoq imaqarnissaa paasisaqarfiugiumallugit Tukummeq Berthelsen takkuppoq.

Lars Løkke: Issittoq pillugu ministereqarfik aqqutissaanngilaq 

Tukummeq Berthelsenilu asuliinnaq takkutinngilaq.

Politikkikkut suli qaninnersumik Kalaallit Nunaata Danmarkillu suleqatigiinnissaat Ministeriunerup Lars Løkke Rasmussenip piaartumik erseqqissarpaa. Kisianni naalakkersuisunik pilersitsissaguni Issittoq pillugu ministerimik pilersitsinianngilaq.  

Taarsiulluguli ileqqoq massakkut atuuttoq, tassa ministereqarfiit assigiinngitsut Kalaallit Nunaat pillugu susassaqarfimminni akisussaaffimmik tigumiaqarnerat, pitsaanerusoraa.  

- Sammisassarisammi taakku tassaapput suliarisanut assigiinngitsunut tunngasut, taakununngalu oqartussaaffik immaqa taakku pillugit allanut ilisimasaqarfiunerpaanngitsunut nuukkaanni pitsaanerusumik suliarineqarnissaat ilimaginngilara, Lars Løkke Rasmussen oqarpoq.

Taamaattorli qinersivimmi qaangiutilersumi IAmik qanimut suleqateqarluarsimanertik qutsatigaa, oqarlunilu danskit politikkikkut ingerlatsineranni oqiliallaataasoq nutaaliornerullunilu, neriuutigalugulu suleqatigiinneq ingerlaqqissasoq.

AAMMA ATUARUK Nunasiaataasimanermut uteqqikkusunngilagut

Kisianni Issittoq pillugu ministereqarfimmik pilersitsisoqassappat politikerimik kalaallimik inuttalerneqassasoq IA Folketingemut isissaguni piumasaqarniarpoq - 5. juunilu qinersinermi partii amerlanerussuteqarluni taaguunneqassappat taanna IA-meersuussasoq piumasaralugu. 

Tamannali ajornartorsiutaasinnaavoq, ministeriuneq oqarpoq, tassami assersuutigalugu nunanut allanut tunngasut pillugit aamma isumannaallisaaneq pillugu danskit naalakkersuisuisa politikkiat Naalakkersuisut suleqatigalugit ingerlanneqartarmat. Danmarkimi Issittoq pillugu ministereqartoqassappat taannalu Kalalalit Nunaanni illua'tungiuliuttuneersuussappat soqutigisat aporaannerannik kinguneqariaannaavoq. 

- Kalaallit Nunaani politikkikkut ingerlatsinermi qitiusut tassaapput Kalaallit Nunaanni Inatsisartut amma Naalakkersuisut. Taakkulu uagut - danskit naalakkersuisui - illua'tungeraatigut. Taamaatumik taakku qanoq suleqatigiissinnaanissaat matumani pingaarneruvoq, erseqqissaavoq. 

Atlantikulli Avannaaniit ilaasortaatitat aalajangiinerminut ilanngutitinniarlugit Folketingimut qinersineq naammassereerpat naalakkersuisunik pilersitsissaguni Lars Løkke Rasmussenip neriorsuutigaa - soorlu 2015-imi taamaaliorluni. 

Folketingimut qinersisinnaanissaq pillugu siunnersuummut qularuteqarneq 

IA-mit siunnersuut alla tassaavoq Kalaallit Nunaanni innuttaasut Danmarkimi najugaqartut Kalallit Nunaanni folketingimut qinigassanik taasisinnaanissaannut periarfissaq. 

Ullumikkut Kalaallit Nunaanni innuttaasut Danmarkimi najugaqartut folketingimut qinigassanik Danmarkimi qinigassanngortittunik taasisarput, soorlu aamma Danmarkimii innuuttaasut Kalaallit Nunaanni najugaqartut Kalaallit Nunaanni qinigassanngortittunik taasisartut.  

Tamannali Aaja Chemnitz Larsenip allanngortinniarpaa, assersuutigalugu kalaallit Danmarkimi ilinniartut Kalaallit Nunaanniit Folketingimut qinigassanngortittunik taasisinnaanngorlugit. 

- Tamanna kalaallit Danmarkimiittut erseqqinnerujussuarmik sunniuteqarnissaannut qularnaarutissaavoq. Tassami taasinisi tamarmik partiinut assigiinngitsorpassuarnut siaruartarmata, taakkulu Kalaallit Nunaat pingaarnerpaatitaannut ilaajuaannarneq ajorpoq, politikeri IA-meersoq oqarpoq. 

Tunngaviatigut danskit savalimmiormiullu ukiuni ikittuni nunatsinni najugaqartut assinganik periarfississallugit aamma piareersimavoq.  

AAMMA ATUARUK Ny praksis om stemmeret

Kalaallit Nunaanniit qinigassanngortittut amerlanerusunik taaguunneqarnerata Kalaallit Nunaanniit Folketingimi amerlanerusunik ilaasortaqarneranik kinguneqarnavianngilaq, ministeriunerup uparuarpaa.

- Kalaallit Danmarkimiittut Kalaallit Nunaanni qinigassanngortittunik taasigaluarpataluunniit suli marluinnaat qinigaassapput. Akerlianik kalaallit Danmarkimi najugaqalersimallutik taasisut danskit folketingimi politikkiannik sunniisinnaapput.

Kalaallilli ukiuni killilinni Danmarkimi najugaqartut Inatsisartunut qinersinermi taasisinnaanissaat Lars Løkke Rasmussen-ip oqallisigissallugu ammaffiginiarpaa. 

Ataasinngormat unnukkut aaqqissuussineq Inuit Ataqatigiit Lars Løkke Rasmussenillu akornanni ingerlanneqarpoq. Ullut ikittunnguit sioqqullugit Atassut peqataarusulluni kissaateqarsimagaluarpoq, IA-milli itigartinneqarsimalluni, Aaja Chemnitz Larsen oqarpoq.  

Ukiut arlerlugit piareersaareerluni ministeriunermik isumaqateqarneq itigartitsinermut tunngaviuvoq, qinersisartunik ataatsimiititsineq tamaallaat IAp Venstrellu akornanni ingerlanneqassasoq isumaqatigiissutigineqareersimammat. 

Aamma Socialdemokratiit siulittaasuat Mette Frederiksen Inuit Ataqatigiit peqatigalugit qinersisartunik ataatsimiititsinissamut aggersarneqarpoq, periarfissaqarsimananili, IA paasissutissiivoq.

Isummersuutit

#FQ2019

Aaja Chemnitz Larsen, folketingskandidat for Inuit Ataqatigiit, afgiver sin stemme til Folketingsvalget i Godthåbshallen i Nuuk. Foto: Christian Sølbeck. (Foto: Christian Klindt Sølbeck/Ritzau Scanpix)

LIVE: Aki Mathilda Høegh Dam aamma Aaja Chemnitz Larsen Folketingimut qinigaapput