Ineqi Kielsen IA-p siunnersuutaanut: Nunasiaataasimanermut uteqqikkusunngilagut
- Nunasiaataasimanermut uteqqikkusunngilagut. Kalaallit Nunaat nukittooq piumasaraarput, nammineersinnaassusilik
Ineqi Kielsen, Siumut tunualiaqutaralugu Folketingimut qinigassanngortittoq taama oqarpoq.
Venstrep Kalaallit Nunaannut tunngasunut oqaaseqartartuata Marcus Knuthip Danmarkimi naalakkersuisunngortussat naalagaaffeqatigiinnut ministerimik ilaneqarnissaannik siunnersuuteqarnerata kingorna taama oqarpoq.
AAMMA ATUARUK Naalagaaffeqatigiit pillugit ministereqartariaqarpugut
Danmark - ukiut arlaqanngitsut eqqaassanngikkaanni - nunani avannarlerni suleqatigiinnermut 1960-imiilli ministereqarpoq. Danskillu naalakkersuisui naalagaaffeqatigiinnut ministerimik ilaneqartariqarput, Marcus Knuth taama siunnersuuteqarpoq.
Ineqi Kielsenili isumaqataanngilaq.
- Nunarput Københavnimi ministereqarfimmit ukiuni qulikkuutaani amerlasuuni aqunneqarpoq. Namminiilivinnissatsinnut sukataaruteqarsimavugut, nammineq aalajangiisinnaassuseqarnissarput sulissutigisimallugu, tusagassiorfinnut nalunaarummi taama allappoq.
AAMMA ATUARUK Inuit Ataqatigiit Issittoq pillugu ministerimik toqqaasoqartinniaraat
Folketingimut qineqqusaarneq aallarteriikatappoq Inuit Ataqatigiillu ataasinngormat nalunaarutigaat partii naalakkersuisunngortitsiniarnermi aalajangiisuusumik inissisimalissagaluaruni Issittumut ministereqalernissaa piumasaqaatiginiarlugu. Aamma ministerip nunatsinneersuunissaa piumasaqaatiginiarpaat. Partiip qinigassanngortitaata sisamaasut ilaat, Aqqalukkuluk Fontain ima oqarpoq:
- Issittoq ukiuni makkunani annertuumik pisoqarfiuvoq. Issittorlu pillugu ilisimaarinnittut Nunatsinneersuupput.
Tamannali Ineqi Kielsenip aamma isumaqatiginngilaa. Aalajangiinerit Inatsisartuni Naalakkersuisunilu pisariaqarput, taama erseqqissaavoq:
- Inuit Ataqatigiit Københavnimi Issittoq pillugu ministereqarfimmut imminnut inississagaluarpata, tamanna piffinnut Siumup partiitut pilersinneqarnerminit akiorsimasaanut uternerussaaq, taama allappoq.
AAMMA ATUARUK Folketingimut qinigassanngortittut 20-t
Folketingimut juunip tallimaani qinersisoqassaaq.
